- वि.सं २o८१ माघ ८ मंगलबार
भारतका एक प्रशिक्षार्थी चिकित्सकको बलात्कारपछि हत्या गरेको अभियोगमा दोषी ठहर भएका एक व्यक्तिलाई आजीवन काराबासको सजाय सुनाइएको छ । बलात्कारपछि हत्याका दोषी सञ्जय रोयलाई सोमबार आजीवन कारावासको सजाय सुनाइएको हो ।
कोलकातास्थित अदालतका न्यायाधीश अनिर्बान दासले चिकित्सकको बलात्कार र हत्याको अभियोगमा दोषी ठहर भएका रोयलाई आजीवन कारावासको सजाय गर्न प्रशासनलाई आदेश दिए ।
अदालतले गत शनिबार ३३ वर्षीय रोयलाई चिकित्सकको बलात्कार र हत्यामा दोषी ठहर गरेको थियो । सन् २०२४ अगस्ट ९ मा कोलकाताको एक सरकारी अस्पतालको सेमिनार कक्षमा प्रशिक्षार्थी चिकित्सकको बलात्कारपछि हत्या भएको थियो ।
पीडितको रगताम्य शव फेला परेको थियो । घटनापछि सरकारी अस्पतालका चिकित्सक थप सुरक्षा माग गर्दै विरोध प्रदर्शनमा सामेल भएका थिए । प्रतिवादी सञ्जय रोयको मुद्दा द्रुत गतिमा सुनुवाइ अघि बढाइएको थियो । यस मुद्दामा एक हप्ताअघि मात्र बहस सकिएको थियो । अस्पतालका स्वयंसेवक रहेका रोयलाई बलात्कार र हत्याको दोषी ठहर गरेपछि न्यायाधीश अनिर्बान दासले सोमबार सजाय सुनाइने बताएका थिए ।
सुनुवाइका क्रममा रोयले लगातार आफू निर्दोष रहेको र आफूलाई फसाइएको दाबी गरेका थिए । भारतमा एक चिकित्सकमाथिको अपराधले देशव्यापी आक्रोश निम्त्यायो । राज्यभरिका चिकित्सकले पीडितलाई न्याय दिन र सरकारी अस्पतालमा कडा सुरक्षा उपायको माग गर्दै लामो समयसम्म विरोध प्रदर्शन गरेका थिए ।
मृतकको शव फेला परेको एक दिनपछि रोयलाई पक्राउ गरिएको थियो । सन् २०१२ मा दिल्लीको बसमा एक युवतीको सामूहिक बलात्कार र हत्याको घटनासँग यस आक्रमणको बीभत्स प्रकृतिको तुलना गरिएको थियो ।
