- वि.सं २o८१ पौष २० शनिबार
पृथ्वी राजमार्गअन्तर्गत धादिङको बेनीघाट रोराङ गाउँपालिका-३ सलाङघाटमा दुईवटा कार एकआपसमा ठोक्किँदा चारजना घाइते भएका छन्।
काठमाडौंबाट पोखरा जाँदै गरेको बागमती प्रदेश ०१-०२९ च १३६९ नम्बरको कार र काठमाडौं आउँदै गरेको बागमती प्रदेश ०१-०३० च ४५०९ नम्बरको कार आपसमा ठोक्किँदा दुवै कारमा सवार २/२ जना घाइते भएको जिल्ला प्रहरी कार्यालय धादिङका प्रहरी नायब उपरीक्षक सुवास हमालले जानकारी दिए।
घाइते हुनेहरूमा पोखरा जाँदै गरेको कारमा सवार काठमाडौंको कागेश्वरी मनोहरा नगरपालिका-२ का २६ वर्षीय प्रज्ञान खड्का र २८ वर्षीय प्रमोद खड्का रहेका छन्।
त्यस्तै, काठमाडौं आउँदै गरेको कारमा सवार रामेछापको खाँडादेवी गाउँपालिका-८ की २१ वर्षीया सुनिता बरैली र मकवानपुरको हेटौँडा उपमहानगरपालिका-८ की २४ वर्षीया बबिता खनाल घाइते भएका छन्। उनीहरू चारैजनाको मलेखुस्थित टिचिङ हस्पिटलमा उपचार भइरहेको प्रहरीले जनाएको छ।
