सन् २०२४ मा धेरै कमाउने १० फुटबलर

अमेरिकाको चर्चित म्यागजिन फोर्ब्सले सार्वजनिक गरेको सन् २०२४ का सर्वाधिक कमाइ गर्ने फुटबलरमा पोर्चुगलका क्रिस्टियानो रोनाल्डो शीर्ष स्थानमा रहेका छन् । साउदी प्रो लिगको अल नासरमा आबद्ध रोनाल्डोले गत वर्ष २६२ मिलियन पाउन्ड कमाएका छन् । दोस्रो स्थानमा अर्जेन्टिनाका लियोनल मेसीले गत वर्ष १२३ मिलियन पाउन्ड कमाए । फोर्ब्सले खेलाडीको आम्दानीको मुख्य आधार क्लबसँग वार्षिक सम्झौता, प्रतिसाताको पारिश्रमिक, विश्वचर्चित कम्पनीसँगको सम्झौतालगायतलाई मानेको छ ।

क्रिस्टियानो रोनाल्डो (पोर्चुगल)
क्लब : अल नासर, कमाइ : २६२ मिलियन पाउन्ड
दुई दशकयता पहिलोपटक बालो डी ‘अर’ अवार्डको मनोनयनमा नपरेका पोर्चुगलका कप्तान क्रिस्टियानो रोनाल्डो गत वर्ष सर्वाधिक कमाइ गर्ने फुटबलर बनेका छन् । फोब्सका अनुसार उनले सन् २०२४ को वर्षमा दुई सय ६२ मिलियन पाउन्ड आर्जन गरे । गत अगस्टमा उनले व्यक्तिगत युट्युब च्यानलसमेत सार्वजनिक गरेका थिए । सिआर सात नामको युट्युब च्यानल एक दिनमै १० लाखले फलो गरी कीर्तिमान बनाएको थियो । अहिले यो बढेर एक अर्ब पुगेको छ । ३९ वर्षीय रोनाल्डोले साउदी प्रो लिगबाट मात्र वार्षिक दुई सय चार मिलियन पाउन्ड लिने गर्छन् । यसका साथै उनको आम्दनीको मुख्य स्रोत नाइक, भेन्चुअर्स तथा विश्व प्रसिद्ध होटेलसँगको साँठगाँठ हो ।

लियोनल मेसी (अर्जेन्टिना) 
क्लब : इन्टर मियामी, कमाइ : १२३ मिलियन पाउन्ड 
सन् २०२४ को वर्ष मेसीलाई सुखद रह्यो । उनले लगातार दोस्रोपटक अर्जेन्टिनालाई कोपा अमेरिकाको उपाधि दिलाए । यस सिजनमा मेसीले डेभिड बेकह्यामको लागनीमा रहेको इन्टर मियामीमा उत्कृष्ट प्रदर्शन गरेका छन् । यद्यपि, उनले इन्टर मियामीबाट खासै ठुलो मोटो रकम लिएका छैनन् । तर, उनी गत वर्ष सर्वाधिक कमाइ गर्ने फुटबलको सूचीमा दोस्रो स्थानमा छन् । उनको मुख्य आम्दानी स्रोत नै विभिन्न कम्पनीसँगको ब्रान्ड एम्बासडरका रूपमा सहकार्य गर्नु नै हो । पछिल्लो समयमा उनी एडिडास र एप्पलसँग आबद्ध छन् । उनको इन्स्टाग्राममा अहिलेसम्म पाँच सय मिलियन फलोअर्स छन् । मेसीले आफ्नो एकल लगानीमा युरोपमा होटेल खुलेका छन् । 

नेमार (ब्राजिल)
क्लब : अल हिलाल, कमाइ : १०१ मिलियन पाउन्ड
ब्राजिलका लिजेन्ड नेमार जुनियर फर्ममा छैनन् । डेढ वर्षअघि फ्रेन्च जर्मेन पेरिस (पिएसजी) छाडेर साउदी प्रो लिगमा आबद्ध भएका नेमारले खासै गतिलो प्रदर्शन गरेका छैनन् । अधिकांश समयमा उनी चोटका कारण नै मैदानबाहिर छन् । तर, अल हिलालले उनलाई वार्षिक मोटो रकम दिँदै आएको छ । यसै कारण उनी गत वर्षको सर्वाधिक कमाइ गर्ने तेस्रो फुटबलर बने । अल हिलालमा उनको सम्झौता सन् २०२५ को मध्यसम्म छ । ३२ वर्षीय नेमार विश्व प्रसिद्ध ब्रान्ड पुमासँग आबद्ध छन् ।

करिम बेन्जिमा (फ्रान्स)
क्लब : अल इतिहाद, कमाइ : ९५ मिलियन पाउन्ड
साउदी प्रो लिगमा युरोपियन फुटबलमा चर्चा कमाएका खेलाडीको आगमन बढ्दो छ । यसै क्रममा रियल म्याड्रिडका करिम बेन्जिमा पनि साउदी प्रो लिगमै भविष्य खोज्दै सन् २०२३ मा अल इतिहादमा आबद्ध भए । पछिल्लो पुस्तामा विश्वकै उत्कृष्ट स्ट्राइकरका रूपमा आफूलाई परिचित गराएका बेन्जिमाले गत वर्ष ९१.५ मिलियन पाउन्ड आर्जन गरे । उनको मुख्य आम्दानी स्रोत नै अल इतिहादबाट प्राप्त गर्ने वार्षिक पारिश्रमिक हो । यसबाहेक उनले मैदानबाहिर ३.५ मिलियन पाउन्ड कमाएका थिए । 

केलियन एम्बाप्पे (फ्रान्स) 
क्लब : रियल म्याड्रिड, कमाइ : ८३ मिलियन पाउन्ड
फ्रान्सका युवा स्ट्राइकर एम्बाप्पे आफ्नो सपनाको क्लब रियल म्याड्रिडमा गत वर्ष आबद्ध भए । लगभग आधा दशक पिएसजीमा बिताएका एम्बाप्पेले च्याम्पियन्स लिग जित्ने उद्देश्यका साथ रियलसँग सम्झौता गरेका हुन् । गत वर्ष उनकै प्रेरणादायी प्रदर्शनमा फ्रान्सले युरो च्याम्पियनसिपमा सेमिफाइनल स्थान सुरक्षित गरेको थियो । गत वर्ष पाँचौँ सर्वाधिक कमाउने फुटबलर बनेका एम्बाप्पेले क्लबबाट वार्षिक रूपमा ६५ मिलियन पाउन्ड लिएका छन् । उनको मैदानबाहिर १८ मिलियन पाउन्ड रह्यो । 

एर्लिङ हाल्यान्ड (नर्वे)
क्लब : म्यानचेस्टर सिटी, कमाइ : ५५ मिलियन पाउन्ड
नर्वेका हाल्यान्डको उत्कृष्ट प्रदर्शनमा म्यानचेस्टर सिटीले एकै वर्ष प्रिमियर लिग, एफए कप तथा च्याम्पियन्स लिग जित्यो । सन् २०२२ मा जर्मन क्लब बोरुसिया डर्टमुन्डबाट सिटीमा आएका हाल्यान्डले सुरुवातदेखि नै गज्जबको खेल खेलिरहेका छन् । सन् २०२४/२५ को सिजनमा सिटीको प्रदर्शन सन्तोषजनक छैन । यद्यपि, नर्वेका स्ट्राइकर युरोपका उदीयमान युवा स्ट्राइकर हुन् । उनी सन् २०२४ को सिजनमा सर्वाधिक कमाइ गर्ने छैटौँ फुटबलर पनि हुन् । अहिले उनी मेसी, रोनाल्डो र एम्बाप्पेले युरोपमा राखेका कीर्तिमान तोड्ने अभियानमा छन् । 

भिनिसियस जुनियर (ब्राजिल)
क्लब : रियल म्याड्रिड, कमाइ : ५० मिलियन पाउन्ड 
ब्राजिलका युवा स्ट्राइकर भिनिसियस जुनियर फोब्सले सार्वजनिक गरेको सर्वाधिक कमाइ गर्ने खेलाडीको सूचीमा नयाँ हुन् । २४ वर्षीय ब्राजिलियन खेलाडीले विश्वकै धनी क्लब मानिने रियल म्याड्रिडका लागि प्रेरणादायी खेल प्रदर्शन गरिरहेका छन् । समर्थकले उनलाई रियलका गोल मेसिन भन्छन् । छोटो समयमै उनले विश्वप्रसिद्ध चर्चित कम्पनीसँग साँठगाँठ गर्न सफल भए । उनले सबैभन्दा ठुलो ब्रान्डका रूपमा पेप्सीसँग सम्झौता गरेका छन् । 

मोहमद सलाह (इजिप्ट)
क्लब : लिभरपुल, कमाइ : ४९ मिलियन पाउन्ड 
इंग्लिस प्रिमियर लिगको २०२४/२५ को सिजनमा लिभरपुलको प्रदर्शन अचम्मको भइरहेको छ । अहिले लिभरपुल उपाधि जित्ने अभियानमा अगाडि बढेको छ । उसलाई रोक्न अन्य क्लबहरू धेरै पछाडि छन् । साबिक चारपटकको विजेता म्यानचेस्टर सिटी शीर्ष पाँचभित्र अटाएको छैन । लिभरपुलको सानदार प्रदर्शनमा स्ट्राइकर सलाह नै हुन् । लिभरपुलको इतिहासमा सबैभन्दा बढी गोल गर्ने खेलाडीमा उनी परेका छन् । उनको सोसल मिडियामा एक सय मिलियन फलोअर्स पुगेका छन् । भोडाफोन र एडिडाससँग उनले सम्झौता गरेका छन् । 

साडिओ माने (सेनेगल)
क्लब : अल नासर, कमाइ : ४८ मिलियन
दक्षिण अफ्रिकी फुटबल राष्ट्र सेनेगलका स्ट्राइकर माने गत वर्ष सर्वाधिक कमाइन गर्ने फुटबलमा नवौँ स्थानमा रहे । फोब्सका अनुसार उनले ४८ मिलियन पाउन्ड कमाइ गरेका छन् । अहिले उनी साउदी प्रो लिगअन्तर्गत अल नासरबाट खेलिरहेका छन् । अल नासरबाट प्राप्त आधीभन्दा बढी रकम उनले सामाजिक कार्यमा खर्च गरेका छन् । सेनेगलमा उनले अस्पताल, पेट्रोल स्टेसन तथा पोस्ट अफिस स्थापना गरेका छन् । अल नासरबाहेक उनले अन्य क्षेत्रबाट खासै आम्दानी गरेका छैनन् । 

केभिन डे ब्रुयने (बेल्जियम) 
क्लब : म्यानचेस्टर सिटी, कमाइ : ३६ मिलियन पाउन्ड 
म्यानचेस्टर सिटीले लगातार चारपटक इंग्लिस प्रिमियर लिग जित्दाका मुख्य खेलाडीका रूपमा केभिन डे पनि एक हुन् । बेल्जियमका यी खेलाडी सम्भवतः अल नासरमा जान सक्ने कुरा चलेको छ । ३३ वर्षीय मिडफिल्डर केभिन डेले सिटीबाट थोरै पारिश्रमिक लिने गरेका छन् । उनको मुख्य आम्दानी स्रोत नै नाइक र म्याकडोनाल्ड हुन् ।