- वि.सं २o८१ पौष २० शनिबार
नयाँ अध्यक्ष नियुक्त भएको डेढ महिना बितिसक्दा पनि आइपिओ स्वीकृतिले गति लिन सकेन
धितोपत्र बोर्डमा प्राथमिक सेयर निष्कासन (आइपिओ)को स्वीकृतिको पर्खाइमा रहेका कम्पनीको संख्या ८५ पुगेको छ । बोर्डका अनुसार बिहीबारसम्म यी कम्पनीहरूले कुल ५१ अर्ब ७४ करोड २४ लाख एक हजार ६ सय ३२ रुपैयाँबराबर आइपिओ निष्कासनको आवेदन दिएका छन् ।
लामो समयदेखि बोर्डको अध्यक्ष नियुक्ति नहुँदा पाइपलाइनमा आवेदनहरू थुप्रिएर बसेका छन् । गत १० मंसिरको मन्त्रिपरिषद्ले सन्तोषनारायण श्रेष्ठलाई बोर्डको अध्यक्षमा नियुक्त गरेयता पनि आइपिओ स्वीकृति प्रक्रिया अघि बढ्न सकेको छैन ।
संख्यात्मक रूपमा सबैभन्दा बढी ४३ जलविद्युत् कम्पनीहरू आइपिओ अनुमतिको पर्खाइमा छन् । यी कम्पनीहरूको प्रस्तावित कुल आइपिओ १८ अर्ब ४० करोड ८४ लाख रुपैयाँ छ । जलविद्युत् क्षेत्रमा सबैभन्दा ठुलो आइपिओ सोलु हाइड्रोपावरले ल्याउने तयारी गरेको छ । यो कम्पनीले दुई अर्ब रुपैयाँको आइपिओ ल्याउने प्रस्ताव गरेको छ ।
कालिञ्चोक हाइड्रोपावरले सबैभन्दा कम सात करोड ५० लाख रुपैयाँको आइपिओ निष्कासन अनुमति मागेको छ । उद्योग क्षेत्रबाट १६ कम्पनीले आइपिओ निष्कासनको अनुमति मागेका छन् । जसमा सबैभन्दा धेरै जगदम्बा स्टिलले प्रतिकित्ता तीन सय रुपैयाँको प्रिमियम मूल्यमा ६ अर्ब दुई करोड १० लाख रुपैयाँबराबर सेयर निष्कासन गर्न चाहेको छ । सबैभन्दा कम परिमाणमा आइपिओको अनुमति माग्नेमा स्मार्ट डोर्स लिमिटेड छ । यस कम्पनीले तीन करोड ६ लाख रुपैयाँको आइपिओ ल्याउने तयारी गरेको छ ।
स्वस्तिक लघुवित्त वित्तीय संस्थाले ८० लाख रुपैयाँको आइपिओका लागि स्वीकृति माग गरेको छ । पाँच लघु बिमा कम्पनीले एक अर्ब १२ करोड ५० लाख रुपैयाँको आइपिओ ल्याउन आवेदन दिएका छन् ।
अन्य १० कम्पनीले कुल तीन अर्ब ३२ करोड २८ लाख ४३ हजार पाँच सय रुपैयाँबराबरको आइपिओ ल्याउन बोर्डमा आवेदन दिएका छन् । यसमध्ये डिस मिडिया नेटवर्कले एक अर्ब ३५ करोड ८४ लाख ९५ हजार पाँच सय रुपैयाँको आइपिओ ल्याउन अनुमति मागेको छ ।
