सतीघाटमा पक्की पुल नहुँदा नागरिकलाई सास्ती

भोजपुर र संखुवासभालाई जोड्ने अरुण नदीको सतीघाटमा पक्की पुल नहुँदा स्थानीयलाई समस्या भएको छ। उत्तरी क्षेत्रबाट बाह्य जिल्ला प्रवेश गर्ने मुख्य नाकाका रूपमा रहेको यो स्थानमा पक्की पुल नहुँदा नागरिकले बर्सेनि दुःख भोग्दै आएका छन्।

वैकल्पिक उपायको रूपमा यहाँ करिब ६ वर्षअघिबाट फेरी सञ्चालन गरिएको छ। तर, विभिन्न प्राविधिक समस्या, हावाहुरी तथा पानीको बहाव बढेसँगै फेरी बन्द हुने भएकाले समस्या झेल्नुपर्ने स्थानीयवासीको भनाइ छ। अरुण नदीमा पक्की पुल नहुँदा उत्तरी क्षेत्रको व्यापारिक केन्द्रको रूपमा रहेको षडानन्द नगरपालिका र साल्पासिलिछो गाउँपालिकाका नागरिकले वर्षौँबाट समस्या भोग्दै आएका छन्। सतीघाटमा पक्की पुल निर्माणका लागि राज्यले ध्यान दिन आवश्यक रहेको स्थानीयवासी नवीन कार्कीले बताए। 

‘अरुण नदीमा पुल नहुँदा सिंगाे उत्तरी क्षेत्रका नागरिकलाई समस्या छ,’ उनले भने, ‘नदीवारि षडानन्द क्षेत्रमा सडक कालोपत्र बन्दै छ। तर, विडम्बना अरुण नदीमा पुल नै छैन। यो नदीमा पुल बनिदिए हाम्रो क्षेत्रको विकासमा टेवा पुग्ने थियो।’ बर्खा समयमा पानीको बहाव बढेपछि पूर्ण रूपमा फेरी बन्द हुने भएकाले झोलुङे पुलबाट नै आवतजावतसँगै पिँठ्युमा बोकेर सामान ओसार्नुपर्ने बाध्यात्मक अवस्था रहेको उनको भनाइ छ।

‘सतीघाटमा पुल बन्छ भन्ने आशामा लामो समय बित्यो,’ उनले भने, ‘हालसम्म उत्तरी क्षेत्रबाट यो अरुण नदीको कुनै पनि स्थानमा पक्की पुल छैन। सवारीसाधन तार्ने सबैभन्दा ठुलो विकल्प नै यही फेरी हो। यो पनि वर्षा सुरु भएपछि बन्द हुन्छ।’

यहाँ ०७६ सालबाट फेरी सञ्चालनमा आएको हो। विभिन्न प्राविधिक समस्याका कारण यो पनि वेलावेला बन्द हुने गरेको छ। त्यससँगै पानीको बहाव बढेपछि भने फेरी पूर्ण रूपमा बन्द हुने स्थानीयवासीको भनाइ छ। नियमित रूपमा भने करिब ६–८ महिना मात्र  फेरी सञ्चालन हुने गरेको छ।

हिउँदको समयमा नदी पार गराउन बिहान ७ बजेबाट बेलुका १० बजेसम्म फेरी सञ्चालन हुने गरेको छ। हाल यही फेरीको सहायताबाट षडानन्द नगरपालिका र साल्पासिलिछो गाउँपालिकाका नागरिक बाह्य जिल्ला आवतजावत गर्दै आएका छन्। फेरीले तत्कालीन समस्या समाधानमा केही राहत मिले पनि स्थायी समस्याको समाधान नरहेको षडानन्द नगरपालिका प्रमुख सुरेन्द्रकुमार उदासले बताए। यहाँ पक्की पुल निर्माणका लागि पहलकदमी गरिरहेको प्रमुख उदासको भनाइ छ।