- वि.सं २o८१ पौष १ सोमबार
संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले कम्बोडिया र भैरहवालाई सीधा हवाई उडानबाट जोड्न प्रस्ताव गरेका छन् । कम्बोडियाका संस्कृति तथा धार्मिक मामिलामन्त्री चाई बोरिनसँग आइतबार भएको भेटघाटका क्रममा उनले कम्बोडिया–भैरहवा–कम्बोडिया सीधा उडानको प्रस्ताव गरेका हुन् ।
मन्त्री पाण्डेले पोखरा र भैरहवा अन्तर्राष्ट्रिय विमानस्थलमा उडान गर्ने वायुसेवा कम्पनीलाई सहुलियत दिइएको कम्बोडियन मन्त्री बोरिनलाई जानकारी गराए । उनले दुवै देशका प्रमुख बौद्ध तीर्थस्थलहरूलाई जोड्ने गरी ‘बौद्ध सर्किट’ विकास गर्न सकिने पनि प्रस्ताव गरे ।
पर्यटन प्रवर्द्धनका लागि दुवै देशका बिचमा कला, संगीत र साहित्यमा सहकार्य तथा सांस्कृतिक महोत्सव कार्यक्रमहरू र पर्यटन बोर्डहरूबिच साझेदारी गर्न सकिने विषयमा पनि छलफल भएको थियो ।
भेटमा दुवै देशका युनेस्को विश्व सम्पदा क्षेत्रहरूको संरक्षण र प्रवर्द्धनमा सहकार्यको सम्भावना, सांस्कृतिक समझदारी र सद्भावलाई गहिरो बनाउने उद्देश्यले युवा र शैक्षिक आदान–प्रदानका सम्भावनालगायत विषयमा दुई मन्त्रीबिच छलफल भयो ।
