मुख्य बिचौलिया पक्राउ नपर्दा पूर्वमन्त्री अधिकारीमाथिको अभियोग कमजोर हुँदै 

जापान मानव तस्करी प्रकरणमा कोशीका तत्कालीन मन्त्रीमाथि अनुसन्धान सकियो 

कोशी प्रदेशका तत्कालीन मन्त्री लीलाबल्लभ अधिकारीको सहयोगमा जापानमा मानव तस्करीको प्रयास भएको घटनाको प्रहरीले अनुसन्धान पूरा गरेको छ । जिल्ला प्रहरी परिसर, काठमाडौंले तत्कालीन मन्त्री अधिकारीसहित १२ जनालाई मुद्दा चलाउन सिफारिस गरेको छ ।

प्रहरीले रायसहितको अनुसन्धान प्रतिवेदन आइतबार सरकारी वकिल कार्यालयमा बुझाएको छ । अनुसन्धान पूरा गरी जिल्ला सरकारी वकिल कार्यालयमा रायसहितको प्रतिवेदन बुझाएको काठमाडौं परिसरका एसपी नवराज अधिकारीले बताए । तर, घटना संगठित प्रकृतिको देखिए पनि प्रहरीले संगठित अपराधतर्फ अनुसन्धान गर्न चासो नदिँदा धेरै पाटो खुल्न बाँकी नै रहेको स्रोत बताउँछ । 

यो प्रकरणमा अधिकारीसहित नौजना पक्राउ परेका छन् । अन्य तीनजना फरार छन् । फरार रहेका तीनजना मुख्य बिचौलिया हुन् । उनीहरूले नै अधिकारीलाई जापान लैजान मनाएका थिए । तर, उनीहरू नै पक्राउ नपर्दा पूर्वमन्त्रीविरुद्ध प्रमाण कमजोर भएको स्रोत बताउँछ । 

मोरङका गोपाल भन्ने योगराज गौतम, उदयरपुरका विष्णु भट्टराई र अमेरिका बस्ने दिवाकरबाबु भट्टराईलाई फरार प्रतिवादी बनाउन सिफारिस गरिएको छ । भट्टराई दाजुभाइ नै मानव तस्करीका योजनाकार हुन् ।

उनीहरूले नै जापानमा हुने ‘इन्टरनेसनल कन्फरेन्स अन ओपन ऐसस टु कल्चर २०२४’ बाट निमन्त्रण मगाएका थिए । रजिस्ट्रेसन शुल्क तिरेपछि त्यहाँबाट निमन्त्रणा प्राप्त हुने भएकाले त्यही कार्यक्रमको आवरणमा मानव तस्करीको योजना बनाइएको थियो । त्यसका लागि सामान्य व्यक्तिलाई भिसा नलाग्न सक्ने भएकाले मन्त्री र उनका टिमका तीनजना बनाएर भिसा लगाइएको थियो । 

उनीहरूको धादिङका महेश पाण्डेसँग चिनजान थियो । हाल थुनामा रहेका पाण्डेले नै पैसा तिरेर जापान जाने व्यक्ति खोजेका थिए । तर, सहजै भिसा नलाग्ने भएकाले कोशी प्रदेशका तत्कालीन आन्तरिक मामिलामन्त्री अधिकारीलाई प्रयोग गरिएको थियो । पाण्डेका साथी योगराज गौतमको उनीसँग चिनजान थियो । उनले नै मन्त्रीलाई जापान जाने प्रस्ताव गरेकोमा उनी तयार भएका थिए । अन्य दुईजनाको परिचयपत्रसमेत उनकै मन्त्रालयको बनाइएको थियो । सोही आधारमा भिसा पाएर मन्त्री र अन्य चारजना सँगै जापान गएका थिए । तर, जापान अध्यागमनले विमानस्थलबाटै फर्काइदिएपछि घटना बाहिर आएको हो । 

प्रहरीले धादिङको त्रिपुरासुन्दरी गाउँपालिका– ६ का महेश पाण्डे, नुवाकोटको विदुर– ७ का जुगल रिजाल र दोलखाको जिरी– ९ का वीरबहादुर सुनुवारविरुद्ध मानव बेचबिखन मुद्दा चलाउन लागिएको छ । यसैगरी खोटाङ ऐंसेलुखर्क– २ दावा शेर्पा, खोटाङकै केपिलासगढी–४ का जनक राई रसुवा कालिका– ५ कञ्चन देवकोटा, गुडी राई र नवीन राईविरुद्ध भने लिखत किर्ते कसुरअन्तर्गत मुद्दा चलाउन लागिएको छ ।