साफ महिला च्याम्पियनसिप २०२४ अन्तर्गत भुटानविरुद्ध पहिलो खेलको लागि प्रशिक्षक राजेन्द्र तामाङले पहिलो एघार सार्वजनिक गरेका छन्।
उनले राष्ट्रिय महिला लिगमा ९ खेलमा १८ गोल गरेकी रश्मीकुमारी घिसिङलाई अग्रपंतीको जिम्मेवारी दिएका छन्। रश्मीलाई सविता राना मगर र अमिषा कार्कीले साथ दिनेछन्।
युएईको अबुधावी काउन्ट्रीमा अनुबन्ध भएकी रेखा पौडेल भने बेन्चमा छिन्। उनी शुक्रबार मात्रै टोलीसँग जोडिएकी हुन्। सावित्रा भण्डारी भने उपलब्ध हुने छैनन्। उनी दोस्रो खेलमा टोलीसँग हुनेछिन्।
प्रशिक्षक तामाङले कप्तान अञ्जिला तुम्बाप्पो सुब्बालाई गोलपोष्टको जिम्मेवारी दिएका छन्। रक्षकमा गीता राना, पुजा राना, अमृता जैशी र हिराकुमारी भुजेल छन्। मिडफिल्डरमा पूर्व कप्तान रेनुका नगरकोटेसँगै सरु लिम्ब र प्रीति राई छन्।
नेपालले प्रतियोगितामा पहिलो खेल खेल्न लागेको हो। पाँच पटक फाइनलमा पुगेर उपाधिबाट टाढा भएको नेपाल यसपटक घरमै उपाधि जित्ने योजनामा छ। खेल अपराह्न ५ः३० बजे सुरु हुनेछ।