एकसाथ चार सहरमा सार्वजनिक भयो टाटाको पन्च इभी

टाटाको पन्च इभी एकैपटक चितवन, पोखरा, बुटवल र भैरहवा गरी चार सहरमा सार्वजनिक भएको छ । विद्युतीय कम्प्याक्ट एसयुभी पन्च इभी यी चारवटै सहरमा एकैदिन औपचारिक रूपमा लन्च गरिएको सिप्रदीले जनाएको छ । 

पोखरामा आयोजित कार्यक्रममा सिप्रदीका सिइओ राजनबाबु श्रेष्ठ र उद्योग वाणिज्य संघ पोखराका अध्यक्ष पवन प्रजापति सहभागी थिए । त्यस्तै, भैरहवा र बुटवलको कार्यक्रममा सिप्रदीका सिइओ राजेशप्रसाद गिरी, प्यासेन्जर भेहिकल बिजनेस युनिट प्रमुख सावन्तजंग सिजापति र सिद्धार्थनगर उद्योग वाणिज्य संघका अध्यक्ष ठाकुरप्रसाद श्रेष्ठको उपस्थिति रहेको थियो । यस्तै, चितवनमा सिप्रदीका भाइस प्रेसिडेन्ट सौरभ थपलिया र चितवन उद्योग संघका अध्यक्ष सूर्यप्रसाद न्यौपाने सहभागी थिए ।

पोखराको कार्यक्रममा बोल्दै सिप्रदीका सिइओ श्रेष्ठले नाडा अटो सोमा सार्वजनिक भएको टाटा पन्च इभीले नेपालभर उच्च माग र बुकिङ पाएको बताए । भैरहवा–बुटवलमा बोल्दै सिइओ गिरीले गाडीको बिक्रीसँगै बिक्रीपछिको सेवामा पनि कम्पनीले उत्तिकै ध्यान दिने प्रतिबद्धता जनाए । कार्यक्रममा पोखरा, चितवन, बुटवल र भैरहवामा गाडी बुक गरेका ग्राहकलाई गाडी हस्तान्तरण गरिएको थियो । टाटा पन्च इभीको प्रारम्भिक मूल्य ३३ लाख ९९ हजार रुपैयाँ तोकिएको छ ।