शिल्पीमा असोज २ देखि ‘मुक्कुमलुङ’

डा. चित्र माबोको कथासंग्रह ‘डोलीभर्ना’मा आधारित नाटक मुक्कुमलुङ (विश्वासको शक्ति) काठमाडौंको बत्तीसपुतलीस्थित शिल्पी थिएटरमा असोज २ गतेदेखि २० गतेसम्म मंगलबारबाहेक मञ्चन हुने भएको छ।

प्राज्ञ राजन मुकारुङले नाट्य रूपान्तरण गरेको ‘मुक्कुमलुङ’लाई रंगकर्मी पवित्रा राईले परिकल्पना तथा निर्देशन गरेकी छिन्। स्रोतव्यक्तिका रूपमा यासेली योङहाङ, स्वप्निल स्मृति र मधु केरुङ ‘केवाफुङ’ रहेका छन्।

नाटकमा रेयर राई, दीपा सुहाङ, नुसा लिङदेन, प्रमिला राई, प्रायस वान्तवा राई, शायोक मुकारुङ, दिवस पयांगु, उदय बेघा लिम्बू, स्मृति कुलमर, उज्वल वान्तवा राई, लहना राई, सुजु सुनुवार, रमिला मोक्तान, आकाश नेपाली, इन्दिरा नेम्वाङ, गोविन्द लिम्बू, हिरन राईलगायतको अभिनय रहने छ।

नाटकमा सञ्जित थुलुङको म्युजिक डिजाइन, मणि किराँतीको सेट डिजाइन र सञ्जीव योगीको लाइट डिजाइन रहने छ। ताप्लेजुङको सिरिजंघा गाउँपालिकाको उपाध्यक्षसमेत रहेका डा. चित्र माबोको कथासंग्रह डोलीभर्ना केही समयअघि सांग्रिला बुक्सले बजारमा ल्याएको थियो। पूर्वीपहाडी क्षेत्रको जनजीवन, त्यस क्षेत्रमा बसोवास गर्ने लिम्बू समाजको मुन्धुमी संस्कृति र अन्य समसामयिक विषयहरूमा लेखिएका १५ वटा कथाहरू डोलीभर्नामा संग्रहित छ।

मुक्कुमलुङलाई आदिवासी लिम्बू जातिले आफ्नो पवित्र आस्थाको केन्द्र एवं मुन्धुमी थलोका रूपमा मान्ने गर्छन्, जुन क्षेत्र अहिले पाथीभराका नामले प्रसिद्ध छ।