- वि.सं २o८१ भदौ १३ बिहीबार
- चाँडो कन्टेनर छुटाउन नसके काठमाडौंसहित प्रमुख सहरमा दसैँका लागि नयाँ कपडा पाउन मुस्किल हुने व्यवसायीको दाबी
- नयाँ कपडा लिएर आएका ८० कन्टेनर र स्याउसहितका फलफूल बोकेका २३ कन्टेनर १४ दिनदेखि खासा र न्यालमका सडकमा अलपत्र
दसैँका लागि लत्ताकपडा र फलफूल बोकेर नेपालतर्फ आएका चिनियाँ कन्टेनर न्यालम र खासाको बिच बाटोमा अड्किएका छन् । कन्टेनर १४ दिनदेखि न्यालममा रोकिएका हुन् ।
मुसा, सिल्क, राखेमालगायत ट्रान्सपोर्ट कम्पनीले ढुवानी गरेका एक सय तीन गाडी चिनियाँ कन्टेनर सामान बिच बाटोमा अड्किएको तातोपानी भन्सारले जानकारी दिएको छ । करिब ८० कन्टेनर सामान सबै दसैँका रेडिमेड सामग्री हुन् । दसैँको मुखमा सामान अड्किएको सुनेका तातोपानी भन्सारका प्रमुख भन्सार अधिकृत दयानन्द केसीले आउँदो बिहीबार खासा र न्यालमको स्थलगत निरीक्षण गर्नेछन् ।
‘खासा पुनर्निर्माण र अन्य विविध कारणले कन्टेनर अड्किएको सुनेको छु,’ केसीले भने, ‘तथ्य केलाउन म आफैँ न्यालम जान्छु ।’ नेपाल र चीनको भन्सारबीच खासामा बैठक हुन लागेको पनि उनले जानकारी दिए । १४ दिनदेखि न्यालममा अड्किएका चिनियाँ फलफूल कुहिनलागेको छ । लगभग २३ गाडी स्याउ रहेका छन् । चिनियाँ एक कन्टेनरबराबर नेपाली तीन कन्टेनर हुन्छ । स्याउ बोकेका कतिपय टेलर लामोलामो भएकाले खासासम्म आउन सकेका छैनन् ।
नेपाल हिमालय सीमापार वाणिज्य संघका सचिव आङ्दोर्जे शेर्पाले खासा पुनर्निर्माणअन्तर्गत बिच भागमा सुरुङ निर्माण जारी रहेकाले टेलर रोकिएको बताए । १४ दिनदेखि न्यालममा रहेका गाडीले पार्किङ भाडा दैनिक एक हजार चिनियाँ युयान तिर्नुपर्छ । ‘चिनियाँ गाडी तातोपानी आउन जति ढिला भयो सामानको मूल्य त्यति नै बढी पर्नजान्छ । पार्किङ भाडा, खानाखाजा र ढिला हुँदा तिर्नुपर्ने बैंकको ब्याज सबै जोडिँदा नेपाली उपभोक्तालाई महँगो पर्नजान्छ,’ शेर्पाले भने । दसैँको समयमा धेरै सामान आउने र गाडी क्युमा बस्नु स्वाभाविक भएको मुसा ट्रान्सपोर्टका नेपाली पक्ष नमस्ते ट्रान्सपोर्टका प्रमुख लोप्साङ शेर्पाले बताए ।
यद्यपि, भूकम्पपछिको खासा पुनर्निर्माण मात्रैले कन्टेनर रोकिएका छैनन् । चिनियाँ भन्सारले सामान पठाउन ढिलाइ गरेकाले कन्टेनर बिचबाटोमा रोकिएका हुन् । त्यसैगरी न्यालम र खासाको बिचमा सुरुङ निर्माण जारी रहेकाले कन्टेनर अड्किएका छन् ।
