प्रतिनिधिसभा सदस्य एकनाथ ढकालले मित्रराष्ट्र मलेसियाको प्रतिनिधिसभाका सभामुख जोहरी बिन अब्दुलसँग शिष्टाचार भेट गरेका छन् । मलेसियन संसद् भवनमा बुधबार भएको भेटमा सांसद ढकालले संसदीय कूटनीतिमार्फत नेपाल र मलेसियाबीचको मैत्रीपूर्ण सम्बन्ध थप उचाइमा पुर्याउनुपर्ने धारणा राखेका थिए ।
सांसद ढकालले नेपालको प्रतिनिधिसभाका सभामुख देवराज घिमिरिको तर्फवाट मलेसियन सभामुखलाई शुभकामना दिँदै उपयुक्त समयमा नेपालको मैत्रीपूर्ण भ्रमणको लागि आग्रह गरे । मलेसियन सभामुख जोहरीले मलेसियाले नेपालसँगको मैत्रीपूर्ण सम्बन्धलाई उच्च महत्त्वमा राखेको बताउँदै अनुकूल समयमा नेपालको भ्रमण गर्ने प्रतिबद्धता जनाए ।
सांसद ढकालले मलेसियामा ठूलो संख्यामा रहेका नेपालीहरूको हितको आवश्यक पहल र सदभावका लागि सभामुख जोहरीसँग आग्रह पनि गरे । भेटमा आपसी सम्बन्ध तथा क्षेत्रीय स्तरमा शान्ति र सहकार्यका लागि अन्तर-संसदीय पहलकदमी अघि बढाउने र नेपाल–मलेसियाका जनप्रतिनिधिबीच निरन्तर संवाद विस्तार गर्ने विषयमा पनि छलफल भएको ढकालले जानकारी दिए । पूर्वमन्त्रीसमेत रहेका ढकाल मलेसियाको तीनदिने मैत्रीपूर्ण भ्रमणमा छन् ।