तेह्रथुम, संखुवासभा र ताप्लेजुङको संगमस्थलमा अवस्थित गुफापोखरीलाई प्राकृतिक, ऐतिहासिक, धार्मिक एवं सांस्कृतिक दृष्टिकोणले सम्पन्न क्षेत्रका रूपमा लिइन्छ । यहाँ २८ प्रकारका लालीगुराँसका प्रजाति पाइन्छन् । समुद्री सतहबाट २,८९६ मिटर उचाइमा यस क्षेत्रबाट विश्वकै अग्लो हिमाल सगरमाथा, तेस्रो अग्लो हिमाल कञ्चनजंघा, पाँचौँ अग्लो हिमाल मकालुलगायत दर्जनौँ हिमालको मनोरम दृश्यावलोकन गर्न सकिन्छ । यो क्षेत्र दुर्लभ तथा लोपोन्मुख वन्यजन्तु तथा पक्षी, बहुमूल्य औषधिजन्य वनस्पतिका साथै जैविक र भौगोलिक विविधताले भरिपूर्ण छ । 

कसरी पुग्ने ? 
काठमाडौंदेखि बन्दीपुरसम्म बसमा जान सकिन्छ । त्यसपश्चात् दुई दिन पैदल यात्रा अथवा जिपबाट जान सकिन्छ । मोटरबाइकबाट धरान, धनकुटा, हिले, वसन्तपुर, चौकी हुँदै पनि गुफापोखरी पुग्न सकिन्छ । 

पहिलो दिन : ४५ मिनेटको काठमाडौं–तुम्लिङटार हवाईजहाज यात्रापछि दुई घन्टा बस वा जिपयात्रापश्चात् मुडे पुगिन्छ । भौगोलिक हिसाबले सुन्दर मुडे बजार चियाबगानको नामले पनि चिनिन्छ । पहिलो दिनको वास मुडेमै बस्न सकिन्छ । 

दोस्रो दिन : बिहानको नास्ता गरेर केही हिँडेपछि कालोगाउँ बस्ती हुँदै घुरबिसे पुगिन्छ । यहाँबाट तेस्रो डाँडैडाँडा गुराँसको बगान छिचोल्दै रमणीय ठाउँ चौकी पुग्न सकिन्छ । चौकीमा वास बस्न पनि सकिन्छ । 

तेस्रो दिन : बिहान उठेर नास्ता गरेपछि डाँडैडाँडा मंगलबारे, श्रीमाने, लामपोखरी हुँदै गुफापोखरी पुगिन्छ । 

चौथो दिन : बिहानै भ्यु प्वाइन्टबाट मनोरम हिमालहरूको दृश्य अवलोकनपश्चात् जिपबाट तुम्लिङटार अथवा हिले फर्कन सकिन्छ ।