भेट्रान प्रोफेसनल गल्फर रामे मगरले सोमबार सूर्य नेपाल गल्फ टुर २०२३–२४ अन्तर्गतको पाँचौँ सूर्य नेपाल च्यालेन्जको पहिलो दिन तीन अन्डर ६५ को स्कोर गर्दै शीर्ष स्थानमा कब्जा जमाएका छन् । रामेले एमेच्योर युवा गल्फर तथा साबिक विजेता सद्भाव आचार्यलाई एक स्ट्रोकले पछि पारेका छन् । दुई अन्डर ६६ स्कोरका साथ सदभाव आचार्य दोस्रो स्थानमा छन् । भुवन नगरकोटी एक अन्डर ६७ स्कोरसहित तेस्रो स्थानमा छन् । भुवनसँगै तेस्रो स्थानमै धनबहादुर थापा रहेका छन् । इभन पार ६८ स्कोर गरेका टंकबहादुर कार्की पाँचौँ स्थानमा छन् । एक ओभर ६९ स्कोरसहित रवि खड्का छैटौँ स्थानमा छन् ।
दुई ओभर ७० स्कोरका साथ पहिलो दिनको खेल समाप्तिसम्म रमेश अधिकारी, सूर्यप्रसाद शर्मा र दिनेश प्रजापतिले संयुक्त रूपमा सातौँ स्थान बाँडेका छन् । पशुपति शर्मा, जयराम श्रेष्ठ, दीपक मगर, तोरणविक्रम शाही तथा एमेच्योर गल्फरद्वय राहुल बिके र टासी छिरिङले तीन ओभर ७१ स्कोर गरी संयुक्त रूपमा १०औँ स्थान बाँडे । लामो समयपछि लयमा रहँदै शीर्ष स्थानमा रहेका रामेले फ्रन्ट नाइन तीन अन्डर ३१ स्कोरको उत्कृष्ट प्रदर्शन गरे । उनले पहिलो, दोस्रो र चौथो होलमा बर्डी प्रहार गरे । ब्याक नाइनमा उनले इभन पार खेल्दै ३४ स्कोर गरे । यस क्रममा उनले फन्ट नाइनको १०औँ, १२औँ र १३औँ होलमा एक–एक सट बचाए ।
राष्ट्रिय टोलीका सदस्यसमेत रहेका गल्फर सदभावले फ्रन्ट नाइनमा तीन अन्डर ३१ स्कोर गरेका थिए । छैटौँ होलमा उनले बोगीविरुद्ध चार बर्डी प्रहार गरे । उनले पहिलो, दोस्रो, सातौँ र आठौँ होलमा एक–एक सट बचाए । ब्याक नाइनमा तीन बर्डी र चार बोगी प्रहार गरेका उनले ११औँ, १३औँ र १६औँ होलमा बर्डी प्रहार गरे । १४औँ, १५औँ र १७औँ होलमा एक–एक सट खेर फाल्दा ब्याक नाइन उनीमा एक ओभर ३५ स्कोरको अवस्थामा पुगे ।
सिजनको चौथो प्रतियोगिता सूर्य नेपाल वेस्टर्न ओपन विजेता भुवनले चौथो र पाँचौँ होलको बर्डीको सहायताले फ्रन्ट नाइन दुई अन्डर ३२ स्कोर गरे । त्यसपछि १०औँ होलमा एक सट बचाएका उनले १३औँ र १६औँ होलको बोगीले ब्याक नाइन एक ओभर ३५ स्कोर गरे ।
