- वि.सं २o८o माघ २१ आइतबार
सहिद गोविन्द गौतमको परिवारलाई आर्थिक सहयोग गरिएको छ। नेपाली चलचित्र काँडेतार उत्पादन कम्पनीले सहिद गौतमको परिवारलाई आर्थिक सहयोग गरेको हो।
सामना फिल्मस् प्रालिले उत्पादन गरेको चलचित्र काँडेतारका निर्देशक नवल खड्काले कञ्चनपुरको पुनर्वास नगरपालिका– ४ स्थित सहिद गौतमको परिवारलाई आर्थिक सहयोग गरेका हुन्। काँडेतारका निर्देशक खड्काले सहिदका बाबु खेमलाल गौतमलाई नगद ५० हजार रुपैयाँ हस्तान्तरण गरे।
खड्काले सहिद गोविन्दको सालिकमा माल्यार्पण गर्दै सहिदको परिवारको सम्मानका लागि केही रकम सहयोग गरेको बताए। काँडेदार फिल्म आगामी २५ फागुनदेखि देशभरका सिनेमा हलमा प्रदर्शन हुँदै छ।
२६ फागुन ०७३ सालमा भारतीय सुरक्षाफौजको गोली लागेर गोविन्दको ज्यान गएको थियो। काँडेतार फिल्म भारतीय विस्तारवाद र भारतीय पक्षबाट नेपाली भूमि अतिक्रमणदेखि हस्तक्षेपमा आधारित छ।
