- वि.सं २o८o पौष २२ आइतबार
ठेक्का सम्झौताअनुसार बाजुराको कोल्टी–मार्तडी सडकअन्तर्गत चुथी–ढम्कने खण्डको पाँच किमि गत असारमै कालोपत्रे भइसक्नुपथ्र्यो, तर पौने पाँच करोड लगिसकेको बानियाँ–ईश्वशेर जेभी १५ प्रतिशत मात्रै काम गरेर दुई वर्षदेखि गायव छ ।
ठेकेदार नै सम्पर्कविहीन भएपछि बाजुराको कोल्टी–मार्तडी सडकखण्डअन्तर्गत पर्ने बडीमालिका नगरपालिका– ७ को चुथीदेखि ढम्कनेसम्मको पाँच किमि सडक कालोपत्रे अलपत्र परेको छ । ३० असार ०८० सम्म काम सक्ने गरी १९ कात्तिक ०७६ मा पूर्वाधार विकास कार्यालय अछामसँग सम्झौता गरेको बानियाँ–ईश्वशेर जेभी कामै नगरी दुई वर्षदेखि सम्पर्कविहीन छ । जब कि २१ करोड ५४ लाख ५६ हजारको ठेक्कामा उसले चार करोड ७३ लाख भने लगिसकेको छ ।
मार्तडीदेखि कोल्टीसम्म तीन खण्डमा पूर्वाधार विकास कार्यालय अछामले टेन्डर गरेको थियो । मार्तडीदेखि चुथीससम्म नौ किलोमिटर पहिलो खण्ड, चुथीदेखि ढम्कनेसम्म पाँच किलोमिटर दोस्रो खण्ड र ढम्कनेदेखि कोल्टीचौरसम्म २६ किलोमिटर ठेक्का गरेर कार्यालयले तीनवटा निर्माण कम्पनीलाई जिम्मा दिएको थियो । मार्तडीदेखि कोल्टीसम्म ४० किलोमिटर कालोपत्रे गर्न प्रदेश र संघ सरकारबाट एक अर्ब ५७ करोड ७५ लाख १२ हजार रुपैयाँ बजेट विनियोजन भएको थियो । पूर्वाधार विकास कार्यालय अछामका सूचना अधकिारी देवीप्रसाद उपाध्यायका अनुसार पहिलो र तेस्रो खण्डमा काम भइरहे पनि दोस्रो खण्डमा १५ प्रतिशतमात्रै प्रगति भएर दुई वर्षदेखि काम नै रोकिएको छ । पाँच पटकसम्म चिठी पठाउँदा पनि ठेकेदारले वास्ता नगरेको उनले बताए ।
‘चुथी–ढम्कने पाँच किमि सडक कालोपत्रे अघिल्लो वर्ष असारमै सकिनुपर्ने थियो । करोनाका कारण भन्दै एक वर्ष म्याद थपेर यो वर्षको असारसम्म लम्ब्याइएको थियो । तर, थपेको म्याद सकिँदा पनि सडक निर्माण १५ प्रतिशतमै सिमित छ,’ उपाध्यायले भने, ‘पहिलो किस्ताको चार करोड ७३ लाख निकासा गरेर लगिसकेको ठेकेदार दुई वर्षयता सम्पर्कविहीन छ । कार्यालयबाट पाँचपटक चिठी पठाइसकेपनि काम गर्न आलटाल गर्दै आएको छ ।’
बडीमालिका नगरपालिका– ७ का वडाध्यक्ष धर्मराज उपाध्यायले पनि चुथीदेखि ढम्कनेसम्म १५ प्रतिशतभन्दा बढी काम नभएको र सडकको धेरै ठाउँमा गाडी तानेर सवार गर्नुपर्ने अवस्था रहेको बताए । स्थानीय धनकृष्ण विकले ठेकेदारको लापरबाहीका कारण यात्रुले समस्या झेल्नुपरेको बताए । सडक अलपत्र अवस्थामै छाड्दा जिप, ट्याक्टरलगायत यतायातका साधन ठाउँठाउँमा फस्ने गरेको उनको भनाइ छ । सडक नबन्दा ४० किलोमिटर सडकमा १५ सयदेखि दुई हजार रुपैयाँ गाडी भाडा तिर्नुपर्ने अवस्था आएको विकको गुनासो छ ।
चुथीमा केही दिन काम गरेबापतको ज्यालासमेत नदिएर सडक निर्माणको काम अधुरो छोडी दुई वर्षदेखि ठेकेदार सम्पर्कविहीन भएको अर्का स्थानीय हंस सार्कीले बताए । सडक धुलाम्मे र जताततै खाल्टाखुल्टीले गर्दा यात्रा गर्न निकै समस्या भएको उनको भनाइ छ । चुथीदेखि ढम्कने सडकखण्डमा ट्याक्टर, जीपलगायत यातायातका साधन तानेर सञ्चालन गर्नुपरेको ट्याक्टरचालक फत्य चौधरीले बताए । सडक राम्रो नहुँदा गाडी चलाउन निकै जोखिम भएको र ४० किलोमिटर सडकमा एक दिनभन्दा बढी समय लाग्ने गरेको उनको भनाइ छ ।
प्रमुख जिल्ला अधिकारी भीमकान्त पौडेलले आयोजना कार्यालय र जिल्ला प्रशासन कार्यालयले ठेकेदारलाई पटकपटक ताकेता गरे पनि बेवास्ता गरेको बताए । तत्काल सडकको स्थलगत अनुगमन गरी यस वर्षभित्र काम सम्पन्न गर्न निर्देशन दिने र समयमै काम सम्पन्न गर्न नसके कानुनबमोजिम कारबाहीका लागि प्रक्रिया अगाडि बढाउने उनको भनाइ छ ।
बानियाँ ईश्वशेर जेभी कम्पनीका ऋषि बानियाँले भने बाजुराकै स्थानीय यज्ञ शाहीलाई कामको जिम्मा दिएको, तर उनले समयमै काम गर्न नसकेको दाबी गरे । ‘उनलाई पटकपटक भनिरहेका छौँ, उनले काम गर्न नसके अर्कोलाई जिम्मा दिएर भए पनि चाँडै काम थाल्छौँ,’ उनले भने । पेटी ठेकेदार यज्ञ शाहीले मेसिनहरू सबै मर्मत गर्नुपर्ने भएकाले सामान बाहिरबाट आउँदै गरेको र केही दिनमा काम सुरु गर्ने बताए ।
