![](https://nayapatrika.blr1.cdn.digitaloceanspaces.com/news/images/kushal-aasif2023-10-27-01-03-09.gif)
कुशल भुर्तेलको आक्रामक अर्धशतकको मद्दतमा टी–२० ट्रयांगुलर सिरिजको फाइनलमा नेपालले युएईलाई जितका लागि एक सय ६३ रनको लक्ष्य दिएको छ ।
कीर्तिपुरस्थित क्रिकेट खेलमैदानमा टस जितेर युएईले फिल्डिङ रोजेपछि पहिले ब्याटिङ गरेको नेपालले निर्धारित २० ओभरमा आठ विकेट गुमाएर एक सय ६२ रन बनायो ।
नेपालका लागि कुशल भुर्तेलले सर्वाधिक ५० रन बनाए । २९ बल खेलेका कुशलले ६ चौका र तीन छक्का प्रहार गरे । टी–२० करिअरको छैटौँ अर्धशतक बनाएलगत्तै उनी जहुर खानको बलमा बोल्ड हुन पुगे ।
आठौँ नम्बरमा ब्याटिङ गर्न आएका करण केसीले १७ बलमा अविजित २३ रन, दीपेन्द्रसिंह ऐरीले १५ बलमा २०, कप्तान रोहित पौडेलले १७ बलमा १८ बनाए । यस्तै, सोमपाल कामीले आठ बलमा १३, सन्दीप जोराले १० बलमा १०, आसिफ शेखले १२ बलमा सात, गुल्सन झाले आठ बलमा पाँच तथा कुशल मल्लले दुई बलमा एक रन बनाए । दुई बल खेलेका अविनाश बोहाेरा शून्य रनमा अविजित रहे ।
नेपालले सुदृढ सुरुवात गरे पनि लगातार अन्तरालमा विकेट गुमाएपछि युएई खेलमा फर्किएको हो । नेपालले पाँचौँ ओभरको अन्तिम बलमा आसिफलाई पहिलो विकेटका रूपमा गुमाएको थियो ।
त्यसपछि ६३ रन बनाउँदा दोस्रो, ६८ मा तेस्रो विकेट गुमायो । रोहित र दीपेन्द्रसिंह ऐरीले केहीबेर इनिङ सम्हाले पनि १२.१ ओभरमा एक सय आठ रनको अवस्थामा कप्तान रोहित आउन भएपछि नेपालले पुनः लगातार विकेट गुमायो ।
रोहित आउट भएलगत्तै दीपेन्द्र आउट भए । नेपालले एक सय २३ रनको अवस्थामा सन्दीप जोरालाई गुमायो । नेपालले एक सय ३१ रनमा गुल्सन झा र एक सय ४३ रनको अवस्थामा सोमपाललाई गुमायो ।
नवौँ विकेटका रूपमा करण केसी र अविनाश बोहाेराबीच १७ रनको साझेदारी भएपछि नेपालले २० ओभरमा एक सय ६२ रन बनायो ।
तर, अन्तिम ओभरमा युएईले जम्मा दुई रन दियो । अन्तिम ओभर बलिङ गर्न आएका जहुर खानले पाँच बल डट राखेका थिए । उनको ओभरमा करणले जम्मा दुई रन लिन सके ।
युएईका लागि आयन अफजल खानले तीन, अली नासिर र जाहुर खानले दुई–दुई तथा जुनैद सिद्धिकीले एक विकेट लिए ।
जारी प्रतियोगिताको लिग चरणमा खेलिएका चारवटै खेल जित्दै नेपाल फाइनल पुगेको हो । युएईले भने एक खेल मात्र जिते पनि नेट रनरेटका आधारमा हङकङलाई पछि पर्दै फाइनल यात्रा गरेको हो ।
नेपालले लिग चरणमा युएईलाई पहिलो खेलमा सात तथा दोस्रो खेलमा पाँच विकेटले हराएको थियो ।