- वि.सं २o८o असार २१ बिहीबार
श्रीलंका भ्रमणमा रहेका एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले त्यहाँका राष्ट्रपति र प्रधानमन्त्रीसँग भेट गरेका छन् । श्रीलंकाका राष्ट्रपति रणिल विक्रमसिंघेसँगको शिष्टाचार भेटवार्तामा दुई देशको आपसी हितबारे छलफल भएको बताइएको छ । राष्ट्रपतिनिवासमा अध्यक्ष नेपालले ४५ मिनेट कुराकानी गरेका थिए ।
यस्तै, नेपालले श्रीलंकाका प्रधानमन्त्री दिनेश गुणवर्धनेसँग पनि शिष्टाचार भेटवार्ता गरेका छन् । प्रधानमन्त्रीनिवासमा करिब १ घन्टा पाँच मिनेटको भेटवार्तामा दुई देशको भाइचारा सम्बन्ध, एसियाली मुलुकहरूमा विकसित घटनाक्रमबारे छलफल भएको नेपालको सचिवालयले जनाएको छ ।
शिष्टाचार भेटमा नेपाल र श्रीलंकाबीच पुरानो मित्रता रहेको बताउँदै दुवै देशले एक–अर्कालाई आवश्यक सरसहयोग गर्न सकिने विषयमा पनि छलफल भएको बताइएको छ । श्रीलंकन कम्युनिस्ट पार्टीको ८०औँ स्थापना दिवसको कार्यक्रममा सहभागी हुन तथा दक्षिण एसियाका कम्युनिस्ट पार्टीहरूको बैठकमा सहभागी हुन नेपाल गत सोमबार श्रीलंका प्रस्थान गरेका थिए ।
