- वि.सं २o७९ पौष २५ सोमबार
छिमेक लघुवित्त वित्तीय संस्थाले आफ्नो छुट्टै मोबाइल बैंकिङ एपमार्फत सदस्यलाई डिजिटल कारोबार गर्ने व्यवस्था मिलाएको छ । संस्थाको मोबाइल बैंकिङ एप तथा क्युआर भुक्तानी प्रणालीको उद्घाटन नेपाल राष्ट्र बैंककी कामु गभर्नर डा. नीलम ढुंगाना तिम्सिनाले गरेकी हुन् ।
यस एपअन्तर्गत कनेक्ट आइपिएस र फोन पे सर्भिसमार्फत नेटवर्कभित्र रहेका बैंक तथा वित्तीय संस्थाहरूमा सजिलै फन्ड ट्रान्सफर गर्न सकिने जनाइएको छ । त्यस्तै, युटिलिटी पेमेन्टको प्रयोगबाट विनाझन्झट बिल भुक्तानी गर्न सकिने व्यवस्था मिलाइएको संस्थाले जनाएको छ । लघुवित्तका सदस्यलाई आफ्नो इकाइ (केन्द्र) बैंठकबारे जानकारी लिन सकिने र कारोबार सफल भएपश्चात् कारोबारको जानकारी रकमसहित बोलेर सुनाउने यस एपको विशेषता रहेको जनाइएको छ ।
संस्थाले आगामी तीन वर्षमा करिब ४० प्रतिशत आफ्ना ग्राहक सदस्यलाई मोबाइल बैंकिङ सेवा पुर्याउने लक्ष्य लिएको जनाएको छ । ०७७ साल फागुनदेखि इसेवामार्फत सदस्यले आफ्नो बचत तथा किस्ता तिर्ने व्यवस्था सुरु गरेकोमा हालसम्म करिब एक अर्बको कारोबार भएको जनाइएको छ ।
