मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेश
  • वि.सं २०७९ माघ २२ आइतबार
  • Sunday, 05 February, 2023
फाइल तस्बिर
२०७९ मङ्सिर २२ बिहीबार १५:१३:००
Read Time : < 1 मिनेट
मुख्य समाचार डिजिटल संस्करण

देशमा संकट देखिए कांग्रेससँग सहकार्य हुन सक्छ : एमाले उपाध्यक्ष पाण्डे

Read Time : < 1 मिनेट
२०७९ मङ्सिर २२ बिहीबार १५:१३:००

एमाले उपाध्यक्ष सुरेन्द्र पाण्डेले एमाले सरकार गठनको दौडमा नरहेको बताएका छन्। प्रेस चौतारी नेपाल, चितवन शाखाले बिहीबार आयोजना गरेको पत्रकार सम्मेलनमा उनले एमालेले अहिले आफ्नो नेतृत्वमा सरकार बनाउने विषयबारे नसोचेको उल्लेख गरे।

उनले भने, ‘अहिलेको संसदमा एमाले प्रतिपक्षमा रहन्छ।’ अहिलेको निर्वाचनले कुनै दललाई पनि बहुमत नदिएको उल्लेख गर्दै उपाध्यक्ष पाण्डेले एकभन्दा बढी दल मिलेर सरकार बनाउनुपर्ने अवस्था रहेको बताए। संसदमा कुनै पनि दलको बहुमत नपुग्दा सरकारले परिणाम दिने गरी काम गर्न नसक्ने उनको भनाइ थियो।  

देशमा आर्थिक र राजनीतिक संकट देखापरे कांग्रेस र एमालेबीच सहकार्य हुन सक्ने उनले प्रस्ट पारे। निर्वाचनमा जनताले पुराना ठूला पार्टीलाई सजग गराउन खोजेको भन्दै उपाध्यक्ष पाण्डेले अब ठूला पुराना पार्टी सच्चिनुपर्ने अवस्था आएको बताए।

‘जनता हिजोदेखि स्थापित पार्टीको पक्षमा देखिए पनि खबरदारी गरेको पाइयो,’ उनले भने। तत्काल वाम एकता सम्भव नरहेको उपाध्यक्ष पाण्डेको भनाइ छ।  प्रतिनिधिसभा र प्रदेश सभा सदस्य निर्वाचनमा सबै दलले आफ्नो मत गुमाउन पुगेकाले अबको राजनीति सहज नहुने उनले बताए। रासस