बौद्ध इन्टरनेसनल स्कुलको आयोजनामा सोमबारदेखि सुरु भएको पाँचौँ बिआइबी कप अन्तरविद्यालय बास्केटबल प्रतियोगिताअन्तर्गत महिलातर्फ बिआइएसले युरो स्कुललाई ३३–३० को झिनो अन्तरमा पराजित गरेको छ । पहिलो क्वार्टरमा दुवै टोलीले समान ८–८ स्कोर गरेका थिए । दोस्रो क्वार्टरमा बिआइएसले युरोलाई ९–७ को अन्तरले पछि पार्यो । तेस्रो क्वार्टरमा बिआइएसले आफ्नो अग्रता कायम राख्दै ९–५ को स्कोर गर्यो । अन्तिम क्वार्टरमा युरोले बिआइएसलाई १०–७ ले पछि पारेको थियो । सो खेलमा बिआइएसकी सव्र्रिना पन्थले १३ स्कोर गरेकी थिइन् ।
यसैगरी पुरुषतर्फ युरोले विन्सोम इंग्लिस बोर्डिङ स्कुल (वेब्स) लाई ४७–१६ ले हरायो । पहिलोदेखि चौथो क्वार्टरसम्म युरो स्कुलले उत्कृष्ट प्रदर्शन गरी वेब्सलाई स्कोर गर्ने मौका दिएन । यस खेलमा विजयी टोलीका अभिनभ थापाले सर्वाधिक २५ स्कोर गरेका थिए । तेस्रो खेलमा नेमोनिक एकेडेमीले निस्ट भक्तपुरमाथि ३५–८ को एकपक्षीय स्कोरमा जित निकाल्यो । यस खेलमा लाक्पाले सर्वाधिक आठ स्कोर गरेका थिए । यसैगरी महिलातर्फ भेनस स्कुल निस्टसँग ३१–९ ले पराजित भएको छ । सो खेलमा निस्टकी पूर्णिमा बरालले सर्वाधिक १८ स्कोर गरेकी थिइन् ।
प्रतियोगितामा काठमाडौं उपत्यकाका विभिन्न २० विद्यालयका २५ टोलीको सहभागिता रहेको इसिएका इन्जार्ज सुब्रत राजोपाध्यायले बताए । पुरुषमा १३ तथा महिलामा १२ टोलीले प्रतिस्पर्धा गर्नेछन् । सहभागी टोलीलाई चार समूहमा विभाजन गरी लिग कम नकआउटका आधारमा खेल भइरहेको छ ।
