पोखरा महानगरपालिकाका पूर्वमेयर मानबहादुर जिसीले आफ्नो कार्यकाल सकिने दुई दिनअघि पोखराका तीन ठाउँका ६३ रोपनी जग्गा ज्वाइँलगायतलाई भाडामा दिएको प्रकरण छानबिनका लागि समिति गठन गरिएको छ । पोखरा उपत्यका नगर विकास समितिका अध्यक्षसमेत रहेका पोखरा महानगरपालिकाका मेयर धनराज आचार्यको अध्यक्षतामा शनिबार बसेको बैठकले नापी कार्यालय कास्कीका प्रमुख दिनेश काफ्लेको संयोजकत्वमा पाँच सदस्यीय छानबिन समिति गठन गरेको हो ।
मेयर आचार्यका प्रेस संयोजक गोविन्द सुवेदीका अनुसार समितिमा विष्णु बराल, झपिन्द्रराज रेग्मी, देवेन्द्र रानाभाट र सुकदेव गौतम सदस्य छन् । समितिलाई सत्य–तथ्य छानबिन गरेर एक हप्ताभित्र प्रतिवेदन पेस गर्ने समय दिइएको छ । त्यस्तै, बैठकले ती जग्गा भाडामा लिने सम्झौता गरेका कम्पनीलाई तत्काल कुनै काम अगाडि नबढाउन पत्राचार गर्ने निर्णयसमेत गरेको छ ।
पोखरा नगर विकास समितिको नाममा रहेको राष्ट्र बैंक चोकस्थित पर्यटन बसपार्क, नयाँ बजारस्थित यातायात कार्यालयअगाडिको तथा राष्ट्र बैंक चोक र मुस्ताङ चोकको बीचमा पर्ने सडकको आडमा रहेको गल्फ कोर्सको जग्गा १० देखि २५ वर्षसम्मका लागि भाडामा दिने गरी ३ जेठमा सम्झौता गरेका थिए । गल्फ कोर्सको ४० रोपनी जग्गा ज्वाइँ विष्णु भण्डारीको कम्पनी गल्फ कोर्स एक्सन बिल्डर्स प्रालिलाई मासिक दुई लाख ७२ हजारका दरले २५ वर्षका लागि भाडामा दिएका थिए । जग्गाको सम्झौतामा जिसी र भण्डारीको हस्ताक्षर छ । भण्डारी जिसीकी जेठी छोरी मञ्जुका देवर हुन् ।
भाडामा दिन सम्झौता गरिएका तीन स्थानमध्ये राष्ट्र बैंक चोक र मुस्ताङ चोकको बीचमा पर्ने सडकको तल्लो भागमा रहेको गल्फ कोर्सको जग्गा भने जिसीले आफ्ना ज्वाइँलाई भाडामा दिएका थिए । २५ वर्षका लागि दिइएको ४० रोपनी क्षेत्रफल रहेको गल्फ कोर्स एक्सन बिल्डर्स प्रालिलाई मासिक दुई लाख ७२ हजार भाडा लिने गरी गरिएको सम्झौता समितिका तर्फबाट जिसी र प्रालिका तर्फबाट विष्णु भण्डारीले हस्ताक्षर गरेका छन् ।
जिसीले १८ रोपनीमा निर्माण गरिएको पर्यटन बसपार्क १० वर्षका लागि शिला शालिग्राम निर्माण सेवा प्रालिलाई मासिक दुई लाख ७५ हजार र यातायात कार्यालयअगाडिको पाँच रोपनी जग्गा राइजिङ कन्स्ट्रक्सन प्रालिलाई १० वर्षका लागि मासिक एक लाख ३५ हजार भाडामा दिने सम्झौता गरेका थिए । ५ जेठसम्म कार्यकाल रहेका उनले समितिका अन्य १० जनालाई पत्तै नदिई ३ जेठमा जग्गा भाडामा दिने सम्झौता गरेका थिए । उक्त सम्झौता हुँदा स्थानीय तह निर्वाचनको मतगणना चलिरहेको थियो ।
