नवनियुक्त सहरी विकासमन्त्री मेटमणि चौधरीले तीव्र गतिमा काम गर्ने बताएका छन् ।
राष्ट्रपति विद्यादेवी भण्डारीबाट पद तथा गोपनियताको सपथ लिएलगत्तै सिंहदरबारस्थित मन्त्रालय पुगेर पदभार ग्रहण गरेका मन्त्री चौधरीले सुस्त काम गर्ने आफ्नो स्वभाव नभएको बताए । ‘म छोटो समयका लागि आएको छु । धेरै काम गर्नुपर्नेछ । त्यसैले मेरो कामको गति तीव्र हुनेछ,’ उनले भने ।
मन्त्री चौधरीले आफूलाई ‘स्पोर्टस् बाइक’सँग तुलना गर्दै भने, ‘मसँग छोटो समय छ । त्यसैले होन्डा जस्तो होइन, स्पोर्टस् बाइकजस्तो थ्री हन्ड्रेड, फोर हन्ड्रेड स्पीडमा हिँड्छु ।’ योग्यता र क्षमताअनुसार काम गर्ने बताएका उनले पदको दुरुपयोग नगर्ने प्रतिबद्धता जनाए ।
