नेपाल मजदुर किसान पार्टीका सांसद प्रेम सुवालले एमसिसी सम्झौता पारित गरिए पान्डोराज बक्स खोलेजस्तो हुने बताएका छन्। आइतबारको प्रतिनिधिसभा बैठकमा सुवालले यस्तो टिप्पणी गरेका हुन्।
‘अमेरिकाजस्तो शक्तिराष्ट्रको कुरा नमान्दा गद्दाफी र सद्धाम हुसेनको हालत हुन्छ भनेर नतमस्तक हुनु आवश्यक छैन। अमेरिकाको आज्ञापालन बन्नु आवश्यक छैन। एमसिसी पारित गरिए पान्डोराज बक्स खोलेजस्तो हुनेछ,’ सांसद सुवालले भने।
एमसिसी आर्थिक उन्नति र गरिबी निवारणसँग सम्बन्धित छ भन्नु झुट रहेको भन्दै उनले यसलाई अमेरिकाको नवउपनिवेशवादी रणनीति रहेको बताए। सुवालले भने, ‘एमसिसीमा आर्थिक उन्नति र गरिबी निवारण झुटो हो। यो अमेरिकाको नवउपनिवेशवादी रणनीती हो। प्रधानमन्त्रीले सित्तैमा आएको किन नलिने भन्नुभयो ? सित्तैमा आएको विष पिए के होला ? मृत्यु हुन्छ।’
एमसिसी अमेरिकी सैन्य रणनीति हो भन्ने स्पष्ट रूपमा आइनसके पनि गुलियो पोतिएको विषमा कोही पनि पर्न नहुने उनले टिप्पणी गरे।
