किर्तेमा सुनौलो खिम्तीका सञ्चालक थापा पक्राउ

बुधबार, २८ पुष, २०७८
डिजिटल संस्करण

अदालतले जालसाजी गरेको ठहर गर्दै दुई वर्ष कैद सजाय सुनाएपछि फरार थिए थापा

जालसाजी कसुरमा प्रहरीले ठेकेदार कम्पनी सुनौलो खिम्ती कन्स्ट्रक्सनका सञ्चालक रामहरि थापालाई पक्राउ गरेको छ । नेपाल प्रहरीको केन्द्रीय अनुसन्धान ब्युरो (सिआइबी)ले उनलाई सोमबार भक्तपुरबाट पक्राउ गरेको हो ।

जिल्ला अदालत काठमाडौंले जालसाजी गरेको ठहर गरेपछि थापा फरार थिए । अदालतले उनीसहित मेखबहादुर श्रेष्ठ र कुमार श्रेष्ठलाई जनही दुई–दुई वर्षको कैदसजाय सुनाएको थियो । गत १३ मंसिरमा अदालतका न्यायाधीश रामप्रसाद शर्माको इजलासले तीनैजनाविरुद्ध कैदसजाय हुने ठहर गरेको थियो । मेखबहादुर यसअघि नै पक्राउ परिसकेका छन् । कुमार भने फरार छन् ।

सिआइबी प्रमुख डिआइजी धिरजप्रताप सिंहले ठेकेदार कम्पनी सुनौलो खिम्तीका सञ्चालक पक्राउ परेको जानकारी दिए । ‘रामहरि थापा पक्राउ परेका छन् । अदालतले उनीविरुद्ध दुई वर्ष कैदसजाय हुने फैसला गरेको रहेछ । खोज्दै जाने क्रममा उनलाई भक्तपुरबाट पक्राउ गरिएको हो । घटना सम्बन्धमा अनुसन्धान जारी छ,’ उनले भने ।

प्रहरीका अनुसार थापाले सुनौलो खिम्तीसँग सरोकार नै नभएका मेखबहादुर र कुमारको नाममा रोक्का राखिएको बैंक खाताबाट तीन करोड पाँच लाख रुपैयाँको चेक काटेका थिए । उनकै योजनामा मेखबहादुर र कुमारले बैंकमा चेक बाउन्स गराएका थिए । आफू ठगिएको भन्दै मेखबहादुर र कुमारले सुनौलो खिम्तीका अन्य साझेदारविरुद्ध मुद्दा हालेका थिए । सोही मुद्दापछि सुनौलो खिम्तीका सबै साझेदारको सम्पत्ति तथा बैंक खाता रोक्का भएको थियो । 

अदालतले थापा र श्रेष्ठद्वयलाई नै दोषी ठहर गरेपछि सुनौलो खिम्तीका अन्य साझेदारका बैंक खाता र सम्पत्ति फुकुवा गरेको छ । ‘अख्तियारीविनै चेकबुकबाट प्रतिवादी मेखबहादुर र कुमारले भुक्तानी पाउने गरी तीन करोड पाँच लाख रुपैयाँको चेक अनादरसमेत गराई कम्पनीका सञ्चालक सेयरधनीलाई नोक्सानी पुर्याउने र प्रतिवादीलाई लाभ हुने गरी जालसाजीपूर्वक चेक जारी भएको हुँदा प्रतिवादीलाई दुई वर्ष कैदसजाय हुने ठहर्छ,’ अदालतकोे फैसलामा भनिएको छ । सुनौलो खिम्ती कन्स्ट्रक्सनका सञ्चालक थापाले श्रीमती विमला श्रेष्ठ र सम्मान ट्रान्सपोर्टको नाममा २९ करोड ७५ लाख रुपैयाँको जाली चेक काटेको खुलेको छ । प्रहरीका अनुसार १४ करोड २५ रुपैयाँको चेक श्रीमती विमलाको नाममा छ । 

See More On

सुझावित समाचार