कृषिप्रधान देश नेपालमा कृषिजन्य वस्तुको आयात झन् झन् बढ्दै गइरहेको छ । कृषिजन्य तथा कृषिबाट उत्पादित वस्तुमा आत्मनिर्भर हुँदै जाने सरकारको नीतिविपरीत त्यस्ता वस्तुको आयात भने अझ बढ्दै गएको तथ्यांकले देखाउँछ ।
चालू आर्थिक वर्षको जेठ महिनासम्ममा सरकारले कुल २ खर्ब ९१ अर्ब ८३ रुपैयाँबराबरको कृषिजन्य वस्तुको आयात भएको भन्सार विभागको तथ्यांक छ । यो अघिल्लो आवको सोही अवधिको तुलनामा ६९ अर्ब ८६ करोडले बढी हो ।
अघिल्लो आर्थिक वर्षको जेठ महिनासम्ममा नेपालले कुल २ खर्ब २१ अर्ब ९७ करोड रुपैयाँबराबरको कृषिजन्य वस्तुको आयात भएको भन्सार विभागको तथ्यांक छ । यसरी आयात हुने वस्तुमा खाद्यान्न, तरकारी, फलफूल, जिउँदा पशुपक्षी, माछामासु, कृषिका प्रशाेधित उत्पादन पर्दछन् ।
कृषि वस्तुमा नेपाललाई सवा २ खर्ब घाटा
उपभोगको तुलनामा उत्पादन वृद्धि नहुँदा कृषि वस्तुको आयात झन् झन् बढ्दै गएको तथ्यांकले देखाउँछ । नेपालबाट हुने कृषि वस्तुको निर्यात तोब्बरले बढेको देखिन्छ, तैपनि यस्ता वस्तुको अन्तर्राष्ट्रिय व्यापारमा नेपालको घाटा झन् बढेको छ । चालू आवको ११ महिनामा सरकारले ७० अर्ब ७१ करोडको कृषि वस्तु निर्यात गरेको छ । जुन अघिल्लो आवको सोही अवधिको तुलनामा २७ अर्ब ७१ करोडले बढी हो । यद्यपि, नेपाललाई कृषिजन्य वस्तुको व्यापारमा २ खर्ब २१ अर्ब ६५ करोड रुपैयाँ घाटा भएको छ ।
आयातसँगै व्यापार घाटा उच्चदरमा बढ्यो
चालू आवको ११ महिनामा नेपालको अन्तर्राष्ट्रिय व्यापार उच्चदरमा बढेको छ । अन्तर्राष्ट्रिय व्यापारका सबै सूचकहरूमा उच्चदरको वृद्धि भएको भन्सार विभागको तथ्यांक छ । जेठसम्ममा कुल वैदेशिक व्यापार २६.५६ प्रतिशतले बढेर १५ खर्ब ४ अर्ब ६१ करोडबराबर पुगेको छ । अघिल्लो वर्षको सोही अवधिमा कुल वैदेशिक व्यापार ११ खर्ब ८८ अर्ब ८१ करोडबराबर पुगेको थियो ।
विभागका अनुसार आयात २५.६७ प्रतिशतले बढेर १३ खर्ब ८३ अर्ब ३६ करोड रुपैयाँबराबर पुगेको छ । गत वर्षको सोही अवधिमा नेपालमा ११ खर्ब ८१ करोडको आयात भएको थियो । त्यस्तै, निर्यात ३७.७८ प्रतिशतले बढेर १ खर्ब २१ अर्ब २५ करोडको निर्यात पुगेको छ । गत आवको जेठसम्ममा नेपालले ८८ अर्ब ३३ लाखको निर्यात गर्न सकेको थियो । आयातसँगै व्यापार घाटासमेत उच्चदरमा बढेको छ । यस अवधिमा व्यापार घाटा २४.६१ प्रतिशतले बढेर १२ खर्ब ६२ अर्ब ११ करोड पुगेको विभागको तथ्यांक छ ।
कुल व्यापारमा निर्यातको हिस्सा ८.०६ प्रतिशत पुगेको छ । जुन अघिल्लो आवको सोही अवधिको तुलनामा ८.८६ प्रतिशतले बढी हो । आयातको हिस ९१.९४ प्रतिशत हो । यो अघिल्लो आवको सोही अवधिको तुलनामा ०.७१ प्रतिशतले कमी हो ।
