पहिलो खेलमा तीनपटकको विजेता स्पेनलाई गोलरहित बराबरीमा रोकेको स्विडेनले शुक्रबार स्लोभाकियालाई १–० ले हराउँदै समूह इबाट नकआउटको चरणको सम्भावना बलियो बनाएको छ, यस समूहमा स्विडेन चार अंकका साथ शीर्ष स्थानमा छ
इमिल फोर्सबर्गले दोस्रो हाफमा पेनाल्टीमार्फत गरेको एक गोलको मद्दतमा स्विडेनले युरोकप २०२० अन्तर्गत आफ्नो दोस्रो खेलमा महत्वपूर्ण जित हात पारेको छ । शुक्रबार साँझ रुसको सेन्ट पिटरबर्गमा भएको खेलमा स्विडेनले स्लोभाकियालाई १–० गोलले पराजित गर्यो । यो जितसँगै स्विडेनले प्रतियोगिताको प्रिक्वार्टरफाइनल चरणमा पुग्ने सम्भावना पनि बलियो बनाएको छ ।
दुई खेलबाट चार अंक जोडेको स्विडेन समूह ईको शीर्ष स्थानमा उक्लिएको छ । स्विडेनसँगको पराजयपछि स्लोभाकियाले भने दोस्रो खेलबाटै नकआउट चरणको यात्रा निश्चित गर्ने अवसर खेर फालेको छ । आफ्नो पहिलो खेलमा पोल्यान्डलाई पराजित गरेको स्लोभाकिया तीन अंकका साथ दोस्रो स्थानमा छ । स्विडेनले आफ्नो पहिलो खेलमा स्पेनसँग गोलरहित बराबरी खेलेको थियो ।
स्विडेनका लागि खेलको निर्धारित समय सकिन मात्रै १३ मिनेटअघि जर्मन क्लब आरबी लेइपजिगका खेलाडी फोर्सबर्गले पेनाल्टीमार्फत निर्णायक गोल गरेका थिए । परिवर्तित खेलाडी रोविन क्वाइसनलाई स्लोभाकियाका गोलरक्षक मार्टिन दुब्राभ्काले लडाएपछि स्विडेनले पेनाल्टी अवसर पाएको थियो । त्यही अवसर फोर्सबर्गले सदुपयोग गरेका हुन् । युरोकप इतिहासमा स्विडेनले पछिल्लो तीन सय ६५ मिनेटपछि पहिलो गोल गरेको हो । सन् २०१६ को युरोकपको आफ्नो पहिलो खेलमा गोल गरेदेखि स्विडेनले युरोकपको खेलमा गोलसम्म गर्न सकेको थिएन ।
स्लोभाकियाले अब समूह चरणको अन्तिम खेलमा स्पेनको सामना गर्नेछ । नकआउट चरण प्रवेशको सम्भावना जीवितै राख्न स्लोभाकियाले स्पेनलाई हराउनुपर्नेछ । स्विडेन र स्लोभाकियाबीच पहिलोपटक मेजर फुटबल प्रतियोगितामा प्रतिस्पर्धा गरेको हो । स्विडेनले पहिलो हाफमा स्लोभाकियाको पोस्टमा पाँचपटक आक्रमण गरेको थियो । पहिलो हाफमा स्विडेनका कप्तान सेवास्टियन लारोसनको प्रहार पेनाल्टी क्षेत्रमा स्लोभाकियाका डिफेन्डरको खुट्टामा लागेर डिफलेक्ट भएको थियो । जसका कारण स्विडेनले पहिलो हाफमै नजिकको दूरीबाट अग्रता लिने अवसर चुकायो । जाने एन्डेसनको प्रशिक्षणमा रहेको स्विडेनले दोस्रो हाफमा सुधारिएको खेल प्रदर्शन ग¥यो । स्विडेनले स्पेनको तुलनामा स्लोकियाविरुद्ध बढी बल पोसेसन बनायो ।
स्लोभाकियाविरुद्धको खेलमा स्विडेनका २१ वर्षीय युवा खेलाडी इस्काकले प्रेरणादायी प्रदर्शन गरेका थिए । यसै सिजनमा सम्पन्न भएको स्पेनिस ला लिगामा उनी युवा खेलाडी वर्ष घोषित भएका थिए । उनले ला लिगामा ३४ खेलमा १७ गोल गरेका थिए । स्लोभाकियाको लगातार ६ खेलको अविजित यात्रा समाप्त भएको छ । खेलमा स्विडेनले ४२ तथा स्लोभाकियाले ५८ प्रतिशत बल पोसेन बनाएको थियो । स्विडेनले १३ पटक पोस्ट चार्ज गर्दा स्लोभाकियाले १० पटक पोस्टमा आक्रमण गरेको थियो ।
