बेलायतको डेली मेलले नेपालमा कोरोना भाइरसको नयाँ भेरियन्ट देखिएको समाचार प्रकाशित गरेपछि अन्तर्राष्ट्रिय सञ्चारमाध्यमहरूले पनि त्यसैलाई उद्धृत गर्दै समाचार दिइरहेका छन् । समाचार प्रकाशित भएलगत्तै विश्व स्वास्थ्य संगठनले नेपालमा नयाँ भेरियन्ट देखिएको पुष्टि नभएको स्पष्ट पारेको छ । स्वास्थ्य मन्त्रालयले बेलायतको सम्बन्धित निकायलाई पनि यसबारेमा प्रश्न उठाउँदै चिठी लेखेको छ ।
डेली मेलले नेपालमा देखिएको कोरोनाको नयाँ भेरिएन्टका कारण नेपालमा छुट्टी मनाउन जानु चुनौतीपूर्ण रहेको सनसनीपूर्ण समाचार दिएको छ । नेपाली अधिकारीले नेपालको बदनाम गराउने उद्देश्यले यस्ता गलत समाचार लेखाइएको आशंका गरेका छन् । समाचारमा नेपालमा खतरनाक नयाँ भेरियन्ट देखिएको, यात्राका लागि जोखिम भएको उल्लेख छ ।
समाचारमा लेखिएको छ, ‘नेपालको नयाँ भेरियन्ट युरोपमा पनि फैलिसकेको छ । यसले बेलायतको बिदालाई असर पारेको छ । यो भाइरसमा कोभिड खोपहरूले काम गर्न नसक्ने वैज्ञानिकहरूको आशंका रहेको समाचारमा लेखिएको छ ।’
स्वास्थ्य मन्त्रालयका प्रवक्ता डा. कृष्ण पौडेलले नेपालमा कुनै नयाँ भेरियन्ट नदेखिएको बताए । ‘अहिलेसम्म नेपालमा नयाँ भेरियन्ट देखिएको छैन,’ प्रवक्ता पौडेलले भने, ‘बुधबारसम्म बेलायतले हामीलाई उपलब्ध गराएको सूचनाअनुसार त्यस्तो केही छैन ।’ पौडेलका अनुसार नेपालबाट विदेश गएका नेपालीहरूको परीक्षण विभिन्न देशमा भइरहेको छ । तर, कुनै पनि देशमा नयाँ भेरिएन्ट देखिएको जानकारी आएको छैन ।’
विदेशी मिडियाले समाचार छापेपछि त्यसबारे नेपालको स्वास्थ्य तथा जनसंख्या मन्त्रालयले पुष्टि गर्न खोजी रहेको छ । ‘समाचार आएको देखेपछि त्यसलाई उद्धृत गर्दै युकेको रोग नियन्त्रण महाशाखालाई के–कसो हो भनेर सोधेको छु । त्यसबारे जवाफ आएपछि सार्वजनिक गछौँ,’ प्रवक्ता पौडेलले भने ।
विश्व स्वास्थ्य संगठन डब्लुएचओले पनि नेपालमा कुनै नयाँ भेरियन्ट हालसम्म पुष्टि नभएको बताएको छ । डब्लुएचओ नेपालस्थित कार्यालयले नेपालमा नयाँ भेरियअन्ट फेला परेको ‘अवगत नभएको’ स्पष्ट पारेको छ ।
विश्व स्वास्थ्य संगठन डब्लुएचओ नेपाल प्रमुख डा. राजेश साम्माजीराव पाण्डवले नयाँ पत्रिकासँग भने, ‘नेपालमा सार्स कोभिड— २ को नयाँ भेरियन्ट फेला परेको भन्ने कुरामा विश्व स्वास्थ्य संगठन अवगत छैन । नेपालमा रहेका भेरियन्टहरू अल्फा (बी.१.१.७), डेल्टा (बी.१.६१७.२) र काप्पा (बी.१.६१७.१) हुन् । यी तीनमध्ये नेपालमा हाल सक्रिय रहेको भेरियन्ट डेल्टा हो,’ प्रमुख पाण्डवले भने ।
नेपालले भारतस्थित प्रयोगशालामा गराएको जिन सिक्वन्सिङको पछिल्लो नतिजा जेठ ४ गते सार्वजनिक गरेको थियो । त्यसैबाट भारतमा देखिएका डेल्टा तथा कापा भेरिअन्ट पुष्टि भएको स्वास्थ्य मन्त्रालयले जनाएको थियो ।
