बैंक अफ काठमाण्डू लिमिटेडले आफ्ना ग्राहकलाई प्रदान गर्दै आइरहेको इन्टरनेट बैंकिङ सेवा ‘बिओके क्लिक’को स्तरोन्नति गरेको छ । बैंकले विभिन्न आकर्षक सेवा तथा सुविधा थप गर्दै परिमार्जित इन्टरनेट बैंकिङ सेवा ल्याएको हो ।
यो सेवामा खाताको जानकारी, बहुखाताहरू लिंक र नियन्त्रण, अन्तरबैंक रकमान्तर, आइपिएस सुविधा, संस्थाको कर्मचारीको तलब व्यवस्थापन तथा तलब रकमान्तरणलगायतका बहु सुविधासहितको सेवा सुरु गरेको बैंकले जनाएको छ । यस सुविधाबाट ग्राहकले बैंकिङ कारोबारका लागि बैंक आइरहनुपर्ने समस्यालाई निवारण हुनुका साथै समयसापेक्ष बैंकिङ सेवाको अनुभव गर्न सक्ने बैंकले विश्वास लिएको जनाइएको छ ।
यस प्रणालीको सुरक्षित प्रयोग गर्न मल्टी लेयर अथेन्टिकेसनको व्यवस्था गरी कुनै कारोबार प्रविष्ट गर्न र स्वीकृत गर्न ग्राहक आफैँले निर्धारण गरेको आधिकारिक प्रयोगकर्ताले मात्र पाउने सुरक्षित तथा सजिलोे व्यवस्था गरिएको बैंकले जनाएको छ । बैंकले हाल ९० शाखा, ७८ एटिएम र १० एक्सटेन्सन काउन्टरबाट सेवा दिइरहेको जनाइएको छ ।
