कर्णाली प्रदेश सरकारका आन्तरिक मामिला तथा कानुनमन्त्री नरेश भण्डारीको नेतृत्वको टोली अग्निपीडितलाई राहत लिएर घटनास्थल जुम्लाको तिला गाउँपालिका– ७ गोठीगाउँमा पुगेको छ ।
मन्त्री भण्डारीसँगै कर्णाली प्रदेश सभा सदस्य दीनबन्धु श्रेष्ठ, पदमबहादुर रोकाया, जुम्लाका समन्वय उपप्रमुख कर्मा बुढा, प्रमुख जिल्ला अधिकारी भूपेन्द्र थापा, तिला गाउँपालिकाका उपाध्यक्ष विष्णु बुढा र सोही गाउँका अगुवा मोतीलाल रोकाया बिहीबार बिहान घटनास्थल पुगेका हुन् ।
समुद्री सतहदेखि करिब तीन हजार मिटर उचाइमा पर्ने गोठीगाउँवासीहरूका लागि न्यानो कपडासहित खाद्यान्नका राहत पठाइएको कानुन मन्त्रालयका सूचना अधिकारी कृष्णबहादुर रोकायाले जानकारी दिए ।
आगलागीबाट सवा तीन करोडभन्दा बढीको धनमाल क्षति भएको अनुमान सुरक्षा निकायले गरेको छ । प्रहरीको मुचुल्का रिपोर्टका अनुसार मानवीय क्षति नभए पनि करिब तीन करोड १८ लाखबराबरको भौतिक धनमाल क्षति भएको छ । जलेका ३२ घरभित्र राखिएका अन्नपात, लत्ताकपडा, भाँडावर्तन सबै जलेर नष्ट भएको प्रहरी निरीक्षक थापामगरले बताए । चुलाको पाइपबाट आगोको झिल्को बाहिर गएर छतमा राखिएको घाँसमा टिपेको र त्यहीँबाट आगलागी भएको प्रारम्भिक अनुसन्धानमा खुलेको प्रहरीको भनाइ छ ।
आगलागीको खबर आएलगत्तै मंगलबार राति नै १८ प्रहरी र सशस्त्रका नौ प्रहरीको टिम घटनास्थल पुगेको थियो ।
