नागरिकलाई बचत गर्न प्रोत्साहित गर्ने तथा सक्रिय जीवनकालमा जम्मा गरेको रकमबाट बचतकर्ताको जीवनयापनलाई सहजीकरण गर्ने उद्देश्यले नागरिक लगानी कोषको ‘नागरिक पेन्सन योजना’मा एनआइसी एसिया बैंक एक्सक्लुसिभ बैंकिङ पार्टनर नियुक्त भएको छ । सम्झौतामा बैंकका प्रमुख कार्यकारी अधिकृत रोशनकुमार न्यौपाने तथा कोषका कार्यकारी निर्देशक रमण नेपालले हस्ताक्षर गरेका थिए ।
सम्पूर्ण नेपालीलाई सहज पेन्सन योजनाको आवश्यकताको पहिचान र महसुस गर्दै नागरिक लगानी कोषले ‘नागरिक पेन्सन योजना’ ल्याएको छ । योजनाअन्तर्गत आय–आर्जन गर्ने, प्रचलित कानुनबमोजिम स्थापना भएका संघ–संस्था एवं प्रतिष्ठानमा कार्यरत श्रमिक–कर्मचारी, स्वरोजगारमा रहेका सर्वसाधारण र गैरआवासीय तथा वैदेशिक रोजगारीमा रहेका नेपाली नागरिकहरू सहभागी हुन सक्ने जनाइएको छ ।
‘जवानीमा कमाऔँ, जमाऔँ र बुढेसकालमा रमाऔँ’ भन्ने नाराका साथ ल्याइएको योजनामा न्यूनतम मासिक ५ सय रुपैयाँदेखि अधिकतम आम्दानीको क्षमताअनुसार १० ले भाग जाने संख्यामा मासिक किस्ता रकम जम्मा गर्न सक्ने जनाइएको छ ।
योजनामा सहभागी हुनेले एनआइसी एसिया बैंकमा रकम जम्मा गर्न सकिने बैंकले जनाएको छ । बैंकले देशभरमा ३ सय २६ शाखा, १ सय ३ एक्सटेन्सन काउन्टर एवं ६४ शाखारहित बैंकिङमार्फत योजनामा सहभागी हुन सकिने जनाइएको छ ।
