परीक्षा केन्द्र सारेर विद्यार्थीलाई दुःख दिन खोजेको भन्दै स्ववियुआबद्ध विद्यार्थीले राजविराजस्थित महेन्द्र विन्देश्वरी बहुमुखी क्याम्पस प्रमुखको कक्षमा तालाबन्दी गरेका छन्। स्नातक तहका ब्याचलर अफ साइन्स (बिएस्सी), ब्याचलर अफ एजुकेसन (बिएड) र ब्याचलर अफ आर्टस् (बिए)को परीक्षा केन्द्र विना कुनै पूर्वसूचना र समन्वय सारिएको भन्दै आक्रोशित विद्यार्थीहरूले शुक्रबार क्याम्पस प्रमुखको कार्यकक्षमा तालाबन्दी गरेका हुन्।
स्वतन्त्र विद्यार्थी युनियन (स्ववियु) राजविराज क्याम्पसका सभापति रञ्जितकुमार यादवले विद्यार्थी तथा सरोकारवाला निकायहरूसँग कुनै छलफल र परामर्श नगरी एकाएक परीक्षा केन्द्र सारिएको बताए। ‘कुनै समन्वय र जानकारीविनै परीक्षा केन्द्र सार्ने निर्णयले विद्यार्थीको आर्थिक भार बढाउने, सुरक्षा जोखिम निम्त्याउने र आवागमनमा प्रत्यक्ष प्रतिकूल असर पार्ने काम गरेको छ,’ सभापति यादवले भने, ‘तत्काल समस्या समाधान गर्न पाँच सूत्रीय माग अघि सारेको छौँ ।’ उनले मागहरू यथाशीघ्र सम्बोधन नगरिए विद्यार्थीको हक–हित र सहजताका लागि चरणबद्ध रूपमा कडा आन्दोलनका कार्यक्रमहरू सार्वजनिक गर्न बाध्य हुने बताए ।
