विनाशकारी भोटेकोशी बाढीमा परी घाइते अवस्थामा उद्धार गरेर अस्पताल भर्ना गरिएकामध्ये अधिकांश डिस्चार्ज भएका छन् । स्वास्थ्य मन्त्रालयका अनुसार घाइते ३०४ जनालाई विभिन्न १७ अस्पतालमा उपचार थालिएको थियो, उनीहरूमध्ये २३० जना उपचारपछि डिस्चार्ज भएका छन् । चारजनाको भने उपचारको क्रममा मृत्यु भएको थियो ।
हाल ७० घाइते उपचाररत छन् । उनीहरूमध्ये पाँचजनालाई आइसियूमा राखेर उपचार भइरहेको छ । काठमाडौंस्थित शिक्षण अस्पतालमा ३०, ट्रमा सेन्टर र प्रसूतिगृहमा १२–१२, वीरमा पाँच, आयुर्वेद चिकित्सा अस्पतालमा तीन, ग्रान्डीमा दुइै तथा वीरेन्द्र सैनिक, मनमोहन शिक्षण, एपिएफ, चिरायु, बिएन्डबी र त्रिशूली अस्पतालमा एक–एकजनाको उपचार भइरहेको स्वास्थ्य मन्त्रालयका सहप्रवक्ता डा. समीरकुमार अधिकारीले बताए । बाढीपछि उपचारका लागि २८ वटा आपत्कालीन उपचार टिम प्रभावित क्षेत्रका अस्पतालमा परिचालन भएको र हाल सेवा सहज भएको मन्त्रालयले जनाएको छ । नुवाकोट, रसुवा र धादिङका स्थानीय स्वास्थ्य संस्थाका सहित १४३ चिकित्सक हाल बाढी प्रभावित क्षेत्रमा खटिएका छन् ।
बाढीमा १३ स्वास्थ्यकर्मी र सात महिला स्वास्थ्य स्वयंसेविका पनि बेपत्ता
बाढीबाट तीन डाक्टर, ६ नर्ससहित १३ स्वास्थ्यकर्मी पनि सम्पर्कविहीन रहेको स्वास्थ्य मन्त्रालयले जनाएको छ । त्यस्तै, रसुवामा कार्यरत सात महिला स्वास्थ्यस्वयंसेविका पनि सम्पर्कविहीन छन् । उनीहरू स्थानीय वडा तथा स्वास्थ्यचौकीहरूमा कार्यरत थिए । मन्त्रालयका अनुसार बाढीले नुवाकोट र रसुवाका ६ वटा स्वास्थ्य संस्थामा क्षति पुर्याएको छ । बाढीले केही स्वास्थ्य संस्थामा पूर्ण तथा केहीमा आंशिक क्षति भएको छ । त्यसैले १० वटाभन्दा बढी होल्डिङ सेन्टरमा समेत स्वास्थ्य डेक्स राखिएको छ । नुवाकोटका अधिकांश घाइतेको त्रिशूली अस्पतालमा उपचार व्यवस्था मिलाइएको छ । यहाँ काठमाडौंबाट गएको ५० भन्दा बढी स्वास्थ्यकर्मीको टिम परिचालन गरिएको छ ।
