बुधबार बिहान रसुवामा आएको बाढीका कारण रामेछापका दुई सरकारी कर्मचारीसहित अन्य ३१ जना मानिस बेपत्ता भएका छन् । बेपत्ता हुने सरकारी कर्मचारीहरूमा मन्थली नगरपालिका– ४, सालुका रामहरि खड्का र सुनापति गाउँपालिका– ५, खनियापानीकी पार्वती मानन्धर रहेका छन् । खड्का रसुवाको इलाका प्रहरी कार्यालय टिमुरेमा प्रहरी सहायक निरीक्षक पदमा कार्यरत रहेका थिए भने मानन्धर अध्यागमन विभाग टिमुरेमा अध्यागमन सहायक पदमा कार्यरत रहेकी थिइन् । हाल उनीहरू दुवैजना बेपत्ता रहेका छन् ।
यसबाहेक उक्त घटनामा परी बेपत्ता हुनेहरूमा रामेछाप नगरपालिका– १, गोठपानीका गुञ्ज श्रेष्ठ, नवराज श्रेष्ठ, रञ्जन श्रेष्ठ, राजन श्रेष्ठ र बिक्री लामा, वडा नं. ३ साँघुटारका दिलबहादुर प्रधान, वडा नं. ४ हिमगंगाका मीन आलेमगर र नवराज आलेमगर र वडा नं. ७ सुकाजोरका सुमनविक्रम कार्की रहेका छन् ।
त्यसैगरी खाँडादेवी गाउँपालिका– ४ पकरवासका उत्तम प्रसाईं र प्रकाश मंग्राती, वडा नं. ८ गागलभदौरेका टलबहादुर भण्डारी रहेका छन् । त्यस्तै, अन्य बेपत्ता हुनेहरूमा दोरम्बा शैलुङ गाउँपालिका– २ दोरम्बाका डम्बरबहादुर मगर, सूर्यबहादुर मगर र रामकुमार मोक्तान, वडा नं. ६ लखनपुरका तारानाथ चौलागाईं, वडा नं. ४ गौश्वाराका नीरा थापा, वडा नं. १ डडुवाका पेन्जु लामा र लाक्पा दोर्जे शेर्पा रहेका छन् ।
त्यसैगरी अन्य बेपत्ता हुनेहरूमा मन्थली नगरपालिका– १ मन्थलीका सानुकुमार श्रेष्ठ र सुन्दर श्रेष्ठ वडा नं. १० चनखुका अभिषेक लामा, वडा नं. ११ गेलुका मीनराज मोक्तान र वडा नं. १४ फुलासीका अनिल पाख्रिन रहेका छन्। त्यस्तै गोकुलगंगा गाउँपालिका– ४ का राजु गजमेर, सुरज श्रेष्ठ र ईश्वरी खड्का रहेका छन् ।
त्यस्तै, लिखु तामाकोशी गाउँपालिका– ५ नागदहका कुशल बुढाथोकी र बुद्धिमान तामाङ रहेका छन् । यसबाहेक उमाकुण्ड गाउँपालिका– १ गुम्देलका ङिमा शेर्पा र वडा नं. ३ कुभुकास्थलीका मधुकुमार कार्की रहेका छन् । परिवारका सदस्यहरूले दिएको विवरणको आधारमा बेपत्ता हुनेहरूको खोजी जारी रहेको जिल्ला प्रहरी कार्यालय रामेछापका सूचना अधिकारी कमल राउतले जानकारी दिए ।
उनले भने, ‘अन्य नागरिकहरू पनि बेपत्ता हुन सक्नुहुन्छ। विवरणहरू आउने क्रम जारी रहेको छ । हालसम्म परिवारका सदस्यहरूले दिएको विवरणअनुसार हराएका व्यक्तिहरूको खोजीका लागि नेपाली सेना, सशस्त्र प्रहरी, नेपाल प्रहरी, स्थानीय नागरिक, उद्धार टोली घटनास्थलमा अहोरात्र खटिइरहेकाले भरपर्दो सूचना पर्खन, नआत्तिन र धैर्य रहन सबै नागरिकहरूसमक्ष आग्रह गर्दछौँ ।’
