गत मंगलबारसम्म फिफा अध्यक्ष जियानी इन्फान्टिनो शक्तिशाली अवस्थामा थिए । इन्फान्टिनोले कसैसँग सल्लाह नगरी फिफाका प्रतियोगिताहरूको सेयर (हिस्सा) निजी लगानीकर्ता कम्पनीलाई बेच्ने योजना बनाएका थिए । उनले यसबाट फिफासँगै फुटबल संघहरू लाभान्वित हुने दाबी गरेका थिए । यस निर्णयका कारण उनको पद धरापमा परेको छ ।
युरोपेली फुटबल महासंघ (युइएफए)ले यस निर्णयको विरोधमा फिफाले आयोजना गर्ने विश्वकपलगायत अन्य अन्तर्राष्ट्रिय सबै प्रतियोगिता बहिष्कार गर्ने चेतावनी दियो । यद्यपि, अमेरिकी राष्ट्रपति डोनाल्ड ट्रम्पको साथ पाउँदा इन्फान्टिनोले आफू सुरक्षित रहेको महसुस गरिरहेका छन् । दुई साताअघि अमेरिका, क्यानडा र मेक्सिकोले सफलतापूर्वक विश्वकप आयोजना गरेपछि ट्रम्पले इन्फान्टिनोको प्रशंसा गरेका थिए । विश्वकै शक्तिशाली व्यक्ति आफ्नो साथमा रहँदा अध्यक्ष सुरक्षित रहने इन्फान्टिनोको विश्वास छ ।
यतिवेला युरोपियन राष्ट्रहरूले भने उनलाई हटाउने मौका पाएका छन् । इन्फान्टिनो फिफा अध्यक्ष भएदेखि नै युरोपियन फुटबल राष्ट्र उनका कट्टर विरोधका रूपमा रहँदै आएका छन् । युरोपेली फुटबल निकायले इन्फान्टिनोलाई पदबाट हटाउने उचित मौका पाएको छ । चौतर्फी विवादपछि इन्फान्टिनोले यस विवादित योजनाबाट पछि हट्ने जनाएका छन् । तर, युरोप भने उनलाई विश्वास गर्न तयार छैन । यसैबिच इन्फान्टिनोका वरिष्ठ सल्लाहकार कार्लोस कोर्डेइरो र चिफ अपरेटिङ अफिसर केभिन लामोरले राजीनामा दिएका छन् । यसले पनि उनको संकट बढेको बिबिसीले जनाएको छ ।
पदबाट हटाउन सकिने आधार
सन् २०१५ मा तत्कालीन अध्यक्ष सेप ब्लाटर भ्रष्टाचारमा मुछिएपछि पदबाट राजीनामा दिएका थिए । लामो समयसम्म अध्यक्षमै बसेका ब्लाटरले आफू विवादबिच फिफा बस्न उचित नभएको जनाउँदै राजीनामा दिँदै नयाँ अध्यक्षलाई बाटो खुला पारे । अहिले सेयर बिक्री गर्ने विषयको विवाद माथिल्लो स्तरमा पुगेपछि धेरैले इन्फान्टिनोले राजीनामा दिएर बाटो प्रशस्त पार्नुपर्ने सल्लाह दिएका छन् ।
इन्फान्टिनो भने आगामी मार्चमा हुने निर्वाचनसम्म बस्ने अडानमा छन् । फिफाका ३७ मध्ये १९ सदस्यले माग गरे आकस्मिक बैठक बस्ने प्रावधान छ । त्यसवेला इन्फान्टिनोलाई राजीनामा दिन दबाब दिन सकिन्छ । फिफामा २११ सदस्यराष्ट्र छन् । जसमध्ये ४३ राष्ट्रले लिखित माग गरेमा विशेष साधारणसभा बोलाउनुपर्छ । यस्तो अवस्थामा उनलाई हटाउन १०६ भोट आवश्यक पर्छ । युरोपसँग मात्रै ५५ भोट छ ।
अफ्रिका, दक्षिण अमेरिका र ओसिएनाले अहिलेसम्म इन्फान्टिनोको पछिल्लो निर्णयको विरोध गर्न सकेका छैनन् । फिफामा युइएफएमा ५५, अफ्रिका ५४, कोन्काकाफ ३५, ओसिएना ११ र कोनमेबोलमा १० राष्ट्र आबद्ध छन् । अहिले १३६ राष्ट्रले उनको प्रस्तावको विरोध गरेका छन् । सधैँ फिफाको नजिक रहेको एसिया भने यसपटक विरोधमा उत्रिएको छ । यसमा कतारले पनि विरोध जनाएको छ । कतार फुटबल संघका अध्यक्ष इब्राहिम खल खालिफाले पनि इन्फान्टिनोको विरोध गरेका छन् ।
अध्यक्षमा भिक्टरको तयारी
विवाद बढिरहँदा अध्यक्ष पदमा सबैभन्दा दावबेदार व्यक्ति भिक्टर मोनटाग्लियानी हुन् । उत्तर र मध्य अमेरिकी फुटबल महासंघले भिक्टर फिफा अध्यक्षका रूपमा प्रमुख दाबेदारका रूपमा अगाडि बढाइसकेका छन् । सन् २०२६ को फिफा विश्वकप तयारीमा उनको ठुलो योगदान थियो । भिक्टरको राम्रो पक्ष भनेको उनलाई धेरै भाषाको ज्ञान छ । जसकारण उनी सहज रूपमा अंग्रेजीबाहेक अन्य भाषा बोल्ने सदस्यहरूसँग सहजै सहकार्य गर्न सक्छन् । फिफामा उनलार्ई सुधारवादी नेताका रूपमा लिने गरिएको छ । रमाइलो पक्ष के छ भने २३औँ संस्करणको विश्वकपमा उनी इन्फान्टिनोको विश्वास पात्र थिए । तर, विश्वकपको सफल आयोजनापछि उत्तर र मध्य अमेरिकाले उनलाई भावी अध्यक्ष बनाउने खुलेर योजना बनाएका छन् ।
