सामसङले नेपालको नयाँ पुस्ताको डिजिटल प्रतिभा विकास गर्ने आफ्नो प्रतिबद्धतालाई सुदृढ पार्दै सामसङ इनोभेसन क्याम्पस (एसआइसी) कोडिङ र प्रोग्रामिङ कोर्स सफलतापूर्वक सम्पन्न गर्दै नयाँ आर्टिफिसियल इन्टेलिजेन्स कोर्सका लागि आवेदन खुला गरेको छ ।
२०२५ डिसेम्बर २२ देखि २०२६ जुन ३० सम्म सञ्चालन भएको कोडिङ र प्रोग्रामिङ कोर्सले विद्यार्थीलाई प्राविधिक सिप, व्यावहारिक परियोजना अनुभव र एक्सपोजर प्रदान गरेको कम्पनीले जनाएको छ । कार्यक्रम सफलतापूर्वक सम्पन्न गर्ने विद्यार्थीलाई विशेष समारोहमा सम्मानसमेत गरिएको छ ।
सामसङको ग्लोबल सिएसआर भिजनअन्तर्गत सन् २०२३ मा नेपालमा सुरु भएको एसआइसीले सञ्चार, सहकार्य र आलोचनात्मक सोचजस्ता कार्यस्थल क्षमताहरूलाई सुदृढ गर्दै उदीयमान प्रविधिमा सान्दर्भिक सिप प्रदान गर्ने बताइएको छ । एआईले उद्योगलाई रूपान्तरण गर्दै डिजिटल पेसेवरहरूको नयाँ पुस्ताको उच्च माग सिर्जना गरिरहेको समयमा सामसङले नयाँ एआई कार्यक्रम ल्याएको हो ।
कक्षाकोठाभन्दा बाहिर पनि सामसङ नेपालले ग्य्राजुएटलाई सामसङका कर्मचारी र उद्योग विशेषज्ञबाट मेन्टरसिप, नवप्रवर्तन परियोजना र करिअर निर्देशनमार्फत सहयोग गर्न जारी राख्ने जनाएको छ । कम्पनीले ‘सामसङ इनोभेसन क्याम्पस अल्मुनाई नेटवर्क’ स्थापना गर्ने योजना पनि बनाएको छ, जसले ग्य्राजुएटलाई एक–आपसमा सम्पर्कमा रहन, निरन्तर सिकाइमा जोडिन र भविष्यका सहभागीलाई सल्लाह दिन सक्षम बनाउनेछ ।
नेपालको एआई इकोसिस्टम निर्माण गर्न, करिअरका अवसर विस्तार गर्न र देशको डिजिटल रूपान्तरणलाई गति दिन शिक्षाविद्, उद्योग र सरकारबिचको बलियो सहकार्य आवश्यक हुने विश्वास सामसङले लिएको छ ।
