सिराहा प्रहरीले जिल्लाको दुई छुट्टाछुट्टै ठाउँबाट पछिल्लो पाँच दिनको अवधिमा कडा खालको मानिने प्रतिबन्धित लागुऔषधसहित पाँचजनालाई पक्राउ गरेको छ । सिराहाको मिर्चैया नगरपालिका– ६, कटारी चोकबाट मंगलबार राति प्लास्टिकबाहेक ७० मिलिग्राम र सिराहा नगरपालिका– १५ बुधौरा चोकबाट एक ग्राम ५४० मिलिग्राम ब्राउनसुगरजस्तो देखिने पदार्थसहित पाँचजनालाई पक्राउ गरिएको जिल्ला प्रहरी कार्यालय सिराहाले जनाएको छ ।
सिराहा प्रहरीका प्रहरीका सूचना अधिकारी प्रहरी नायब उपरीक्षक रमेशबहादुर पालका अनुसार लागुऔषध लुकाएर राखिएको भन्ने गोप्य सूचनाको आधारमा इलाका प्रहरी कार्यालय मिर्चैयाबाट खटिएको प्रहरी टोलीले प्लास्टिकबाहेक ७० मिलिग्राम लागुऔषध, नगद र पाँच थान मोबाइलसहित पाँचजनालाई पक्राउ गरिएको हो ।
मिर्चैया– १ का करिब ३५ वर्षीय उमेश श्रेष्ठले सञ्चालन गरेको बेकरी पसलबाट चारवटा कालो प्लास्टिकको पोकामा लुकाएर राखिएको आगुऔषध, २२ हजार २५० रुपैयाँ नगद बरामदसँगै बेकरी सञ्चालक श्रेष्ठसहित मिर्चैया– ८ जीवा टोलका करिब ३२ वर्षीय चन्द्रप्रसाद गिरी, मिर्चैया– ६ का करिब २१ वर्षीय देवकुमार पासवानलाई पक्राउ गरिएको उनले बताए । पक्राउ गरिएकाहरूलाई मिर्चैया प्रहरीमा राखेर थप अनुसन्धान भइरहेको प्रहरीले जनाएको छ ।
त्यस्तै, सीमावर्ती प्रहरी चौकी खिरौनाबाट गस्तीमा खटिएको प्रहरी टोलीले गत शनिबार सिराहा– १५ बुधौराबाट भारत हुँदै नेपालतर्फ म.प्र. ०१–००४ प ६२३५ नम्बरको मोटरसाइकल चढेर आउँदै गरेका कल्याणपुर नगरपालिका– ८ का करिब २२ वर्षीय सुनील मण्डलले भित्री वस्त्रमा कालो प्लास्टिकमा लुकाएको एक ग्राम ५४० मिलिग्राम ब्राउनसुगरजस्तो पदार्थ बरामद गरेको छ । प्रहरीका अनुसार ब्राउनसुगरजस्तो पदार्थ बरामद भएपछि मोटरसाइकलचालक सुनिलसहित पछाडि बसेका करिब १९ वर्षीय नरेश मण्डललाई समेत पक्राउ गरी जिल्ला प्रहरीमा राखेर थप अनुसन्धान भइरहेको छ ।