देउवा–कोइराला पक्षले बोलायो १४औँ महाधिवेशनबाट निर्वाचित केन्द्रीय समिति बैठक

कांग्रेस संस्थापन अनुशासनको कारबाही गर्ने तयारीमा, भोलि अनुशासन समितिको बैठक बस्दै

मंगलबार, १७ चैत, २०८२
डिजिटल संस्करण

निर्वाचन आयोगले विशेष महाधिवेशनपछिको कांग्रेस नेतृत्वलाई वैधानिकता दिए पनि सर्वोच्च अदालतमा मुद्दा विचाराधीन भएका वेला पूर्वसभापति शेरबहादुर देउवा र नेता डा. शेखर कोइराला समूहले समानान्तर गतिविधि थालेको छ । कांग्रेस नेतृत्वको वैधानिकताबारे सर्वोच्च अदालतले आगामी आइतबार सुनुवाइ तोकेको छ, त्यसअघि दुवै पक्ष रणनीतिक छलफल र गतिविधिमा छन् ।

केही दिनअघि संस्थापन पक्षले केन्द्रीय समिति बैठकमार्फत आगामी १६–१९ असोजमा १५औँ केन्द्रीय महाधिवेशन आह्वान गरेको छ । यसका लागि उसले महाधिवेशनको सम्पूर्ण कार्यतालिकासमेत बनाइसकेको छ । सर्वोच्चको फैसलापछि कांग्रेसको आन्तरिक विषय हेरफेर हुन सक्ने ठाउँ छ ।

यहीवेला इतरपक्षले १४औँ महाधिवेशनबाट निर्वाचित केन्द्रीय समितिको बैठक मंगलबार बिहान बोलाएको छ । कांग्रेस केन्द्रीय कार्यालयका पूर्वमुख्यसचिव कृष्णप्रसाद पौडेलले अघिल्लो कार्यसमितिमा रहेका, तर हालको संस्थापन पक्षमा नभएका नेताहरूलाई बुधबार बैठकमा सहभागी हुन अनुरोध गरेका छन् । ‘हामीसँग पार्टी कार्यालय छैन, तर पार्टीको केन्द्रीय समितिको बैठक जुन प्रक्रियाबाट बसिन्छ, त्यहीअनुसार बैठक बस्न लागेको छ । कार्यवाहक सभापतिका रूपमा पूर्णबहादुर खड्काले बैठकको अध्यक्षता गर्नुहुन्छ,’ इतरपक्षका एक नेताले नयाँ पत्रिकासँग भने । 

अघिल्लो महाधिवेशनपछि निर्वाचित केन्द्रीय सदस्य रामहरि खतिवडाले मंगलबार बिहान केन्द्रीय समितिको बैठक बोलाइएको र समसामयिक परिस्थितिबारे छलफल गर्न लागिएको जानकारी दिए । ‘हाम्रो मुद्दा अदालतमा छ । सर्वोच्च अदालतको आदेश आउन बाँकी छ । एउटा पक्षबाट महाधिवेशन आह्वान भएको छ । अर्को पक्ष समेटिएको छैन । यी सबै विषयमा छलफल गर्न लागिएको बुझेको छु, मलाई पनि बोलाइएको छ,’ खतिवडाले भने । 

शनिबार पूर्वगृहमन्त्री तथा कांग्रेस नेता रमेश लेखकलाई जेन–जी आन्दोलनमा भएको नरसंहारमा दोषी अभियोगमा प्रहरीले पक्राउ गरेपछि दुवै पक्षले समानान्तर विज्ञप्ति जारी गरेका थिए । संस्थापन पक्षले लेखकको पक्राउ गर्दा विधि मिचिएको, जेनजी आन्दोलन जाँचबुझ आयोगको प्रतिवेदन त्रुटिपूर्ण र अपूरो रहेको उल्लेख गरे पनि लेखकको रिहाइ माग गरेको थिएन । 

तर, इतरपक्षले विशेष महाधिवेशन पूर्व रहेको पदीय हैसियतमा कांग्रेसको लेटरप्याड प्रयोग गरेर बेग्लै विज्ञप्ति निकालेको थियो । कार्यवाहक सभापतिको हैसियतमा पूर्णबहादुर खड्काले विज्ञप्ति जारी गरेपछि संस्थापन पक्ष आक्रोशित भएको छ । पार्टी अनुशासन समिति बैठक बुधबार तोकिएको छ, जहाँ इतरपक्षीय नेताले पार्टी अनुशासन उल्लंघन गरेको पिषयमा छलफल हुने नेताहरूले बताएका छन् । 

कांग्रेस महामन्त्री गुरुराज घिमिरेले अहिले निर्वाचन आयोगले निर्णय गरेर विशेष महाधिवेशनबाट निर्वाचित नेतृत्वलाई मान्यता दिइसकेपछि र नयाँ नेतृत्वको हस्ताक्षरमा चुनावमा सहभागी भएको विषय सबैले स्वीकार गर्नुपर्ने बताए । ‘योबाहेक अरू विकल्प छैन । समानान्तर गतिविधि अनुचित र अर्थहीन छ,’ महामन्त्री घिमिरेले भने ।

अनुशासन समिति बैठक : खड्का र विश्वकर्मामाथि छलफल हुने
कांग्रेस अनुशासन समितिको बैठक बुधबार अपराह्न १ बजे तय भएको छ । तारामान गुरुङ संयोजक रहेको समितिले विशेषतः समानान्तर गतिविधि र पार्टी हितविपरीतका वक्तव्य दिएका नेताहरूबारे छलफल हुने एक नेताले बताए ।

‘समानान्तर रूपमा गतिविधि गरेका र पार्टीको लेटरप्याडको दुरुपयोग गरेका पूर्णबहादुर खड्का र पार्टीमा विभाजन ल्याउने गरी बोलेका मीन विश्वकर्माका बारेमा छलफल हुनेछ, बाँकी विषयमा पनि हुँदै जाला’ संस्थापन पक्षका एक नेताले भने । विश्वकर्माले अहिले कांग्रेसमा दुईजना सभापति रहेको भन्दै विशेष महाधिवेशनको नेतृत्वलाई सार्वजनिक रूपमा चुनौती दिँदै आएका थिए । अनुशासन समितिको बैठकमा गत निर्वाचनमा भएका अन्तर्घातका बारेमा पनि छलफल हुनेछ । शेरबहादुर देउवाको अन्तर्घातका कारण पार्टीले कम्तीमा २१ सिट हार्नुपरेको संस्थापन पक्षको आन्तरिक निष्कर्ष छ । एक नेताले भने, ‘पूर्णबहादुर खड्का र मीन विश्वकर्माको क्रियाशील सदस्यता नवीकरण नगर्नेसम्मको निर्णय हुन सक्छ ।’

इतर पक्षको कार्यक्रममा ११ सांसद, खड्का र कोइरालाको सम्बोधन
 

सोमबार धुम्बाराहीको स्मार्ट होटेलमा नवनिर्वाचित सांसदहरूको बधाई तथा शुभकामना कार्यक्रममा सहभागी नेताहरू । तस्बिर :  दिपेन्द्र ढुंगाना/नयाँ पत्रिका

प्रतिनिधिसभा र राष्ट्रिय सभामा निर्वाचिन कांग्रेसका सांसदसँग सोमबार देउवा समूहका नेताहरूले छलफल गरेका छन् । धुम्बाराहीको स्मार्ट होटेलमा भएको कार्यक्रमलाई कांग्रेस नेताद्वय पूर्णबहादुर खड्का र डा.शेखर कोइरालाले सम्बोधन गरेका छन् । खड्का कार्यवाहक सभापतिका रूपमा प्रस्तुत भएका थिए । सांसदहरूको बधाई कार्यक्रममा कांग्रेस नेताहरू विमलेन्द्र निधि, डा. शशांक कोइराला, प्रकाशमान सिंह, एनपी साउदलगायत सहभागी थिए । प्रतिनिधिसभामा कांग्रेसको कुल ३८ सिटमध्ये ११ जना सांसद मात्रै चियापान तथा छलफलमा सहभागी भए । चियापानमा प्रतिनिधिसभाका सांसदहरू रुक्मिणी कोइराला, उर्मिला थपलिया रीना उप्रेती, विष्णुबहादुर खड्का टेकबहादुर गुरुङ, गंगालक्ष्मी अवाल, गीता सेङदेन सुशीला ढकाल आचार्य, हरिनादेवी कामी, जयपति रोकाय र निनु कर्ण सहभागी थिए । राष्ट्रिय सभाका सांसद रञ्जित कर्ण, खम्मबहादुर खाती, चन्द्र केसी, जगत तिमल्सिना, गीता देवकोटा, सुनीलबहादुर थापा, वासुदेव जंगली र धर्मेन्द्र पासवान सहभागी थिए । कांग्रेस नेता खड्काले संविधान संशोधनको बहसमा सहभागी हुन, संसद्मा प्रभावकारी भूमिका निर्वाह गर्न तथा संसद्मा नभएका तर अनुभवी नेताहरूसँग निरन्तर सम्पर्कमा रहेर सुझाव लिन अनुरोध गरेका थिए । यी सबै सांसद शनिबार पार्टीद्वारा आयोजित अभिमुखीकरणमा पनि सहभागी थिए । 

सुझावित समाचार