स्थानीय तह वा प्रदेशको जिम्मेवारी छाडेर संघीय संसद् पुग्ने लक्ष्यसहित प्रतिनिधिसभा निर्वाचनमा होमिएका कोशी प्रदेशका अधिकांश जनप्रतिनिधिले हार व्यहोर्नुपरेको छ । पदमै रहँदा लोकप्रियता देखाएका धेरै नेता संघीय निर्वाचनमा भने अपेक्षित समर्थन जुटाउन असफल हुँदा पराजित भए ।
स्थानीय तहका वडाध्यक्ष, प्रमुख तथा उपप्रमुखसहित एक प्रदेश सभा सदस्यसहित आठजना पद त्यागेर संघीय सांसद बन्न निर्वाचनमा होमिएका थिए । जसमा धरान उपमहानगरपालिकाका प्रमुख हर्कराज राई (हर्क साम्पाङ) बाहेक सबै पराजित भएका छन् । दुईजना उम्मेदवारले अत्यन्तै कम मत ल्याउँदै जमानतसमेत जोगाउन सकेनन् भने केहीले प्रतिस्पर्धात्मक मत पाए पनि अन्तत: विजय हात पार्न सकेनन् ।
धरान उपमहानगरपालिकाको प्रमुख पदबाट राजीनामा दिएर श्रम संस्कृति पार्टी खोलेर सुनसरी १ बाट उम्मेदवारी दिएका साम्पाङले जित निकालेका छन् । निर्वाचनको अन्तिम मतपरिणामअनुसार उनले ३५ हजार ७४१ मत प्राप्त गर्दै विजय हासिल गरेका छन् । धरान नगरपालिका– १७ का वडाध्यक्ष पद त्यागेर नेपाली कम्युनिस्ट पार्टीबाट उम्मेदवारी दिएका सूर्यबहादुर भट्टराई ६ हजार १८५ मत मात्र प्राप्त गर्दै चौथो स्थानमा सीमित भए । उनी पनि हर्कसँगै भिडेका थिए ।
मोरङको रंगेली नगरपालिकाको प्रमुख पद छाडेर एमालेबाट प्रतिनिधिसभा चुनाव लडेका दिलीपकुमार अग्रवालले भने प्रतिस्पर्धात्मक मत पाए पनि जित निकाल्न सकेनन् । मोरङ २ बाट एमालेका उम्मेदवार बनेका उनले १५ हजार ६२४ मत प्राप्त गर्दै दोस्रो स्थान हासिल गरेर चित्त बुझाएका छन् । उक्त क्षेत्रमा रास्वपाका उम्मेदवार कृष्णकुमार कार्की ४० हजार ९२४ मत ल्याउँदै विजयी भए ।
इलामको सूर्योदय नगरपालिकाका प्रमुख पद त्यागेर प्रतिनिधिसभा चुनावमा होमिएका रणबहादुर राई पनि सफल हुन सकेनन् । इलाम १ बाट नेकपाका उम्मेदवार बनेका उनी हालसम्मको मतगणनाअनुसार पाँचौँ स्थानमा छन् । उनको जित अनिश्चित बनेको छ ।
सोलुखुम्बुको थुलुङ दुधकोशी गाउँपालिकाका अध्यक्ष पद त्यागेर चुनाव लडेका असीम राई पनि पराजित भएका छन् । सोलुखुम्बुमा कांग्रेसका प्रकाशसिंह कार्कीले १३ हजार १६६ मत ल्याउँदै जित हासिल गरेका छन् । असीम राई नौ हजार ४१४ मत प्राप्त गर्दै दोस्रो स्थानमा सीमित भएका छन् । उनी नेकपाबाट लडेका थिए । ओखलढुंगाको लिखु गाउँपालिकाकी उपाध्यक्ष अस्मिता थापा पनि प्रतिनिधिसभा निर्वाचनमा सफल हुन सकिनन् । एमालेबाट उम्मेदवारी दिएकी उनले चौथो स्थान मात्र हासिल गरिन् ।
जमानत जफत भएका सिटौला र राई
उदयपुरको लिम्चुङबुङ गाउँपालिकाका अध्यक्ष पद छोडेर स्वतन्त्र उम्मेदवार बनेका मेजर राईले अत्यन्तै न्यून मत प्राप्त गरेका छन् । उदयपुर २ बाट उम्मेदवारी दिएका उनले जम्मा ९० मत पाएर जमानतसमेत जोगाउन सकेनन् । आफ्नै गाउँबाट उनले २० भोट पाए । उदयपुर २ मा रास्वपाका उम्मेदवार सूर्यबहादुर तामाङले १४ हजार ८०२ मत ल्याउँदै विजय हासिल गरे । कोशी प्रदेश सभा सदस्य पद त्यागेर झापा ४ बाट प्रतिनिधिसभा सदस्यका लागि उम्मेदवारी दिएका राष्ट्रिय प्रजातन्त्र पार्टीका भक्तिप्रसाद सिटौला दुई हजार ८० मत ल्याउँदै पाँचौँ स्थानमा सीमित भए । उनको जमानतसमेत जोगिएन । उक्त क्षेत्रमा रास्वपाका उम्मेदवार शम्भुप्रसाद ढकालले ४३ हजार ६३१ मत ल्याउँदै सहज जित हात पारेका थिए ।
