बिहारमा नीतीश कुमारको युग अन्त्य हुँदै, पहिलो भाजपा मुख्यमन्त्री बन्ने बाटो खुल्यो

शुक्रबार, २२ फागुन, २०८२
डिजिटल संस्करण

बिहारका मुख्यमन्त्री नीतीश कुमारले बिहीबार राज्यसभाका लागि उम्मेदवारीको घोषणासँगै यसबारेमा केही दिनदेखि चलिरहेको अनुमान सही साबित भएको छ । नीतीशको यस कदमले बिहारमा नयाँ मुख्यमन्त्रीको नियुक्तिको बाटो खुला हुनेछ । आगामी नेतृत्व नीतीश नेतृत्वको जनता दल युनाइटेड(जेडियू)को सत्ता सहयोगी दल भारतीय जनता पार्टी (भाजपा)बाट हुने अनुमान उच्च छ । यद्यपि, नीतीशको राजीनामा र उनको उत्तराधिकारीको शपथग्रहणको सही समयरेखा अझै स्पष्ट भने गरिएको छैन । भाजपा नेताहरूले यससम्बन्धी अन्तिम टुंगो आगामी केही हप्ताभित्र लाग्ने बताएका छन् । 

बुधबारदेखि पटनाको राजनीतिक वृत्तमा नीतीशले आफ्नो उत्तराधिकारीका लागि बाटो खोल्न केन्द्रीय संसद्को माथिल्लो सदन राज्यसभामा जान सक्ने चर्चा सुरु भएको थियो । मार्च १६ मा हुने राज्यसभा चुनावका लागि उम्मेदवारी दर्ता गर्ने अन्तिम मिति बिहीबार थियो । अन्तत: अनुमानलाई सही साबित गर्दै राज्यसभा सदस्यका लागि उम्मेदवारी दर्तापछि मुख्यमन्त्रीले बिहीबार ट्विटरमा लेखे, ‘दुई दशकभन्दा लामो समयदेखि, तपाईंहरूले निरन्तर ममाथि आफ्नो विश्वास र समर्थन कायम राख्नुभएको छ । त्यही विश्वासको बलमा, हामीले बिहार र तपाईंहरू सबैको पूर्ण समर्पणका साथ सेवा गर्न सक्यौँ । तपाईंको विश्वास र समर्थनको कारणले गर्दा नै बिहार आज विकास र मर्यादाको नयाँ पहिचान प्रस्तुत गरिरहेको छ । यसका लागि म धेरै–धेरै कृतज्ञता व्यक्त गर्दछु ।’

मुख्यमन्त्रीको पदबाट राजीनामाको अड्कलबाजीपछि बिहीबार बिहानदेखि ठुलो संख्यामा जेडियू कार्यकर्ता र समर्थकहरू नीतीश कुमारको घर बाहिर भेला भएका थिए । तिनले नीतीश कुमारलाई मुख्यमन्त्री नत्याग्न आह्वान गरिरहेको सुनिन्थ्यो । नीतीश कुमारको बिहार राजनीतिबाट बहिर्गमनसँगै राज्यमा नीतीश, लालु प्रसाद र रामविलास पासवानको युगको अन्त्य भएको केहीले विश्लेषण गरेका छन् ।

नीतीश कुमारले बिहारको मुख्यमन्त्रीको पदमा रेकर्ड १० पटक शपथ लिए । उनी सन् २००५ देखि सो पदमा छन् । सन् २०१४ को लोकसभा चुनावपछि छोटो समयका लागि जितनराम माझी मुख्यमन्त्री भएको बाहेक समय प्राय: उनी नै मुख्यमन्त्री रहे । तर, पछिल्लो केही समयदेखि भाजपाले बिहारको मुख्यमन्त्री पद आफूले पाउनुपर्ने माग गर्दै आएको छ । गत वर्ष भएको बिहार विधानसभा चुनावमा एनडिएले गरेको सिट बाँडफाँट सूत्र घोषणामा जेडियू र भाजपाले बराबर संख्यामा सिट बाढेका थिए । त्यस बाँडफाटमार्फत दुई दलले आफूहरू दुवै राज्यमा समान हैसियतको रहेको सन्देश दिन खोजेका थिए । 

नीतीश कुमार राज्यसभामा गएसँगै आगामी मुख्यमन्त्री आफ्नो दलको हुने भाजपाको आशा छ । उसो त हिन्दीभाषी क्षेत्रमा भाजपाले कहिल्यै मुख्यमन्त्री बनाउन नसकेको एक मात्र राज्य बिहार मात्र हो । भाजपा बिहारमा जतिसक्दो चाँडो नेतृत्व परिवर्तन चाहन्छ । बिहार विधानसभा चुनावपछि अहिले भाजपासँग ८९ विधायकहरू छन् भने जेडियूसँग ८५ । भाजपाले नीतीश कुमारको स्वास्थ्य पनि केही बिग्रिएकाले राज्यमा उनले नेतृत्व भाजपालाई दिएर सम्मानजनक बिदाइ लिनुपर्ने बताउँदै आएको छ । 

विधानसभा चुनावअघिदेखि ७५ वर्षीय नीतीशको स्वास्थ्यबारे विभिन्न अड्कलबाजी हुन थालेका थिए । जेडीयुले नीतीशसँगको भेटघाट निक्कै घटाएको थियो । पार्टीभित्रका सिमित नेताबाहेक बाहिर नदेखिने नीतीशले पछिल्लो समय मिडियालाई कुनै अन्तर्वार्ता दिएनन् । उनले पहिलेजस्तो आममतादातासँग पनि भेटेको पाइँदैन । 

एक भाजपाका वरिष्ठ नेताले आफूहरूले मुख्यमन्त्री पाउनुपर्ने कारणबारे बताउँदै भने, ‘नीतीश कुमारको स्वास्थ्यको चिन्ता पनि छ । साथमा एनडीए गठबन्धनभित्र हाम्रो ठुलो सिट संख्याको पनि कुरा छ । भाजपाले समान संख्यामा सिटमा चुनाव लड्ने निर्णय गर्यो । अघिल्लोपटक बिहार राज्य विधानसभामा हाम्रो पार्टीको प्रदर्शन जेडियूभन्दा राम्रो थियो । तैपनि, हामीले गठबन्धनको धर्म निभाएर नीतीशलाई मुख्यमन्त्री बनाएका थियौँ । यसपटक पनि हाम्रो संख्या बढी आएको छ । हामीले अहिलेसम्म केही भनेनौँ । तर, नीतीश कुमार ७५ वर्ष पुग्नुभएको छ र लामो समयदेखि मुख्यमन्त्रीको रूपमा सेवा गर्नुभयो । अब नीतीशलाई ‘सम्मानजनक बिदाइ’ गर्दा उनी र उनको पार्टीले प्रस्ताव स्वीकार गर्नुपर्छ ।’ 

यसबिच नीतीश कुमारका छोरा निशान्त कुमार चाँडै नै औपचारिक रूपमा जेडियूमा सामेल हुने चर्चा पनि छ । छोरालाई सक्रिय राजनीतिमा स्थापित गराउन पनि नीतीशले भाजपामासँग कुनै खालको सम्झौता गर्न सक्ने विश्लेषण पनि छ । मार्च १८ मा हुने राज्यसभा चुनावपछि नयाँ मन्त्रिपरिषद्मा उपमुख्यमन्त्री नियुक्त हुन सक्ने चर्चा पनि छ । जेडियूका वरिष्ठ नेता तथा बिहारका मन्त्री श्रवण कुमारले मंगलबार यसबारेमा बोल्दै निशान्त ‘सक्रिय राजनीतिमा’ प्रवेश गर्ने पुष्टि गरे ।

(जामिया मिलिया इस्लामी विश्वविद्यालयबाट विद्यावारिधि गरेर १७ वर्षदेखि पत्रकारिता गर्दै आएकी पाण्डे राजनीति तथा नीतिबारे लेख्छिन्)

द प्रिन्टबाट

सुझावित समाचार