साबिक विजेता भारतले १०औँ संस्करणको आइसिसी टी–२० विश्वकप क्रिकेट प्रतियोगिताअन्तर्गत सुपर ८ मा कमजोर सुरुवात गरेको छ । सुपर ८ को समूह ‘१’ को पहिलो खेलमा दक्षिण अफ्रिकाले भारतमाथि ७६ रनको सानदार जित निकालेको हो । जितसँगै दक्षिण अफ्रिकाले महत्वपूर्ण २ अंक जोडेको छ । अहमदाबाद रंगशालामा टस जितेर पहिलो ब्याटिङ गरेको दक्षिण अफ्रिकाले २० ओभरमा सात विकेट गुमाएर १८७ रनको मजबुत योगफल बनाएको थियो ।
प्रत्युत्तरमा भारत १८.५ ओभरमा १११ रनमै समेटिँदा दक्षिण अफ्रिका ७६ रनले विजयी भयो । दक्षिण अफ्रिकाले सन् २०२४ को टी–२० विश्वकप फाइनलमा भारतसँग व्यहोरेको हारको बदला लिएको छ । सो विश्वकप फाइनलमा भारतले दक्षिण अफ्रिकालाई पराजित गरेको थियो । दक्षिण अफ्रिका र भारत आ–आफ्नो समूहका विजेता थिए । उनीहरूले समूह चरणमा कुनै पनि खेल गुमाएका थिएनन् । चालू विश्वकपमा भारतको यो पहिलो हार हो ।
दक्षिण अफ्रिकाले आफ्नो अपराजित खेल संख्या पाँच पुर्याएको छ । भारतविरुद्ध सानदार जित दर्ता गर्ने क्रममा दक्षिण अफ्रिका मार्को जानेसनले घातक बलिङ प्रदर्शन गरे । उनले ३.५ ओभरमा २२ रन खर्चेर चार विकेट लिए । उनले १.१ ओभरमा तिलक बर्मा, ४.३ ओभरमा अभिषेक शर्मा, १८.४ ओभरमा शिवम दुबे र १८.५ ओभरमै जसप्रीत बुमराहको विकेट लिँदै दक्षिण अफ्रिकालाई २ अंक दिलाए । यसैगरी स्पिनर केशव महाराजले पनि कसिलो बलिङ गरी भारतका तीन विकेट आफ्नो नाममा लेखाए ।
केशवले १४औँ ओभरमा उत्कृष्ट स्पेल फ्याँकेका थिए । उनले सो ओभरमा तीन विकेट हात पारेका थिए । १४.१ ओभरमा हार्दिक पान्ड्या, १४.३ ओभरमा रिंकु सिंह तथा १४.६ ओभरमा अश्रदीप सिंहको विकेट लिएका थिए । यसैगरी, कोर्बिन बोचले १२ रन दिँदै दुई विकेट लिए । उनले ७.२ ओभरमा वासिंटन सुन्दर र ९.१ ओभरमा सूर्यकुमार यादवको महतवपूर्ण विकेट लिए ।
दक्षिण अफ्रिकाको दमदार ब्याटिङ
यसअघि पहिलो ब्याटिङ गरेको दक्षिण अफ्रिकाको सुरुवात कमजोर भएको थियो । भारतीय फास्ट बलर जसप्रीत बुमराहले दुई र अश्रदीप सिंहले एक विकेट लिएपछि दक्षिण अफ्रिका ३.६ ओभरमा २०/३ को नाजुक अवस्थामा रह्यो । समूह चरणमा उत्कृष्ट ओपनिङ गरेका कप्तान एडेन माक्राम र क्विन्टन डी ककले १० रनको साझेदारी गरेका थिए । डी ककले सात बलमा ६ रन जोडे । त्यसपछि कप्तान माक्रामले सात बलमा ४ रन बनाए । रायन रिकल्टनले सात बलमा ७ रन बनाएर आफ्नो विकेट बुमराहलाई दिए ।
सुरुवातमा धरमराएको ब्याटिङ इनिङ्स डेवाल्ड ब्रेभिस र डेभिड मिलरले सम्हाले । दुवैले चौथो विकेटका लागि केवल ५१ बलमा ९७ रनको साझेदारी गर्दै दक्षिण अफ्रिकालाई बलियो स्थितिमा पुर्याए । ब्रेभिसले आक्रामक ब्याटिङ गर्दै २९ बलमा ४५ रन जोडे । उनले समान तीन चौका र छक्का प्रहार गरेका थिए । उनी शिवम दुबेको ओभरमा अभिषेक शर्माबाट क्याच आउट भए । त्यसपछि मिलरले ट्रिस्टनसँग पाँचौँ विकेटका लागि २१ बलमा ३५ रन बटुलेका थिए ।
क्रिजमा सेट भइसकेका ब्याट्सम्यान डेभिडलाई वरुण चक्रवर्थीले क्याच आउट गराए । डेभिडले ३५ बलमा सात चौका र तीन छक्का प्रहार गरी सर्वाधिक ६३ रनको योगदान दिए । उनी आउट हुँदा दक्षिण अफ्रिका १५.४ ओभरमा १५२/५ को बलियो अवस्थामा रह्यो । ट्रिस्टनले अन्तिमसम्म नटआउट रही दक्षिण अफ्रिकाको रनरेट उकास्ने काम गरे । उनले भारतीय बलरविरुद्ध डेथ ओभरमा आक्रामक हुँदै उत्कृष्ट स्ट्रोक लगाए । उनले २४ बल खेलेर तीन छक्का र एक चौका प्रहार गरी ४४ रनको योगदान दिए । दक्षिण अफ्रिकाले आठौँ विकेटका लागि सात बलमा २० रन जोडेको थियो । भारतले ११ अतिरक्त रन दिएको थियो ।
साबिक विजेताको फितलो ब्याटिङ
१८८ रनको लक्ष्य पछ्याएको भारतले सुरुवातदेखि नै कमजोर ब्याटिङ गर्यो । इनिङ्सको ०.४ ओभरमै विकेट गुमाएको भारतले त्यसपछि पुनरागमन गर्न सकेन । दक्षिण अफ्रिकाले निरन्तर विकेट लिँदै गएको थियो । भारतका लागि सर्वाधिक रन शिवम दुबेले जोडेका थिए । उनले ३७ बलमा तीन छक्का र एक चौका प्रहार गरी ४२ रन बनाए । हार्दिक पान्ड्याले १७ बलमा १८ तथा कप्तान सूर्यकुमारले २२ बलमा १८ रन जोडेका थिए । ओपनर ईशान किसन शून्यमा आउटट भए । तिलक बर्माले १ रन जोडे । आक्रामक ब्याट्सम्यान रिंकु सिंह सामना गरेको दोस्रो बलमै पेभेलियन फर्के ।
