प्रधानमन्त्रीले भनिन्– कुनै पनि आमाको काख रित्तिन नपरोस्

प्रधानमन्त्री सुशीला कार्कीले आगामी दिनमा कुनै पनि आमाको काख रित्तिन नपरोस् भन्ने कामना गरेकी छिन्। शुक्रबार सहिद दिवसको अवसरमा एक सन्देश जारी गर्दै उनले सहिदहरूको साहस, चेतना र संकल्पका कारण आज देश परिवर्तनको ऐतिहासिक मोडमा उभिएको बताउँदै नागरिक स्वतन्त्रता र लोकतन्त्रका लागि आफ्नो अमूल्य जीवन अर्पण गर्ने सबै सहिदहरूप्रति  श्रद्धाञ्जली अर्पण गरिन् । 

उनले भनेकी छिन्, ‘न्याय, समानता, उत्तरदायी शासन र उज्यालो भविष्यको आशामा उठेको जेन–जी आन्दोलनमा सहादत प्राप्त गर्ने वीर योद्धाहरूलाई पनि नमन।’ उनीहरूको साहस, चेतना र संकल्पकै कारण आज देश परिवर्तनको ऐतिहासिक मोडमा उभिएको बताउँदै शासकीय मूल्य, नैतिकता र नागरिकको सम्मानमा आधारित राज्य निर्माणको दायित्व प्रत्येक शासकको सधैँ स्मरणमा रहनुपर्ने उल्लेख गरिन् ।