राष्ट्रिय लिगमा मोफसलबाट प्रतिस्पर्धा गर्न लागेको पोखराको लालीगुराँस एसोसिएसनलाई नेपाल प्रिमियर लिग (एनपिएल)को फ्रेन्चाइज टोली पोखरा एभेन्जर्सले साथ दिने भएको छ । अखिल नेपाल फुटबल संघ (एन्फा)को आयोजनामा बुधबारदेखि लिग सुरु भएको हो । लिगमा प्रेसिडेन्ट कप च्याम्पियनको हैसियतले पोखराको लालिगुरासले प्रतिस्पर्धा गर्न पाएको हो ।
१७ टोलीले प्रतिस्पर्धा गर्ने लिगमा ए डिभिजनका १३ टोलीसँगै प्रेसिडेन्ट कपमा शीर्ष चारमा परेको टोली रहेका छन् । कास्की जिल्ला र प्रदेश लिगको उपाधि चुम्दै हेटौंडामा सम्पन्न प्रेसिडेण्ट कपको उपाधि जितेर लालीगुराँसले लिगको यात्रा तय गर्न सफल भएको हो । पोखरा महानगरपालिका–१२ मा रहेको लालीगुराँस एसोसिएसन क्लब ०६९ सालदेखि सामाजिक कामसँगै फुटबलमा सक्रिय रहँदै आएको छ ।
लिगमा पहिलोपटक सहभागी हुन लागेको लालीगुराँसलाई पोखरा एभेन्जर्सले विदेशी खेलाडीहरू आवद्ध गर्नसँगै टोलीलाई बलियो बनाउन सहयोग गर्ने भएको छ । पोखरा एभेन्जर्सले सहयोग गरे बापत लालीगुराँसका खेलाडीहरूको जर्सीको पछाडि भागमा जर्सी नम्बर, तल पोखरा एभेन्जर्स लेख्ने गरी सहमति भएको हो ।
लालिगुराँसका अध्यक्ष डम्बर गुरुङले मोफसलका क्लबहरूका लागि तीन महिना राजधानीमा गएर खेल्न आर्थिक रुपमा कठिन हुने अवस्था रहेकोमा पोखरा एभेन्जर्ससँगको सहकार्यले केही राहतसँगै टोलीलाई समेत उत्साहित बनाएको बताए । लिगका लागि करिब एक करोड रुपैयाँ खर्च हुने उनले बताए । यसअघि एन्फा प्रेसिडेण्ट कपको क्रममा सहयोगी, शुभेच्छुकसँगै केही ऋण गरी ५० लाखको हाराहारीमा खर्च भएको अध्यक्ष गुरुङको भनाइ छ ।
क्लबका महासचिव ईश्वर बस्यालकाअनुसार लिगमा सहभागी नहुँदा एन्फाले कारवाही गर्ने भएकाले प्रतियोगिताको लागि आवश्यक बजेट अभाव हँुदाहुँदै पनि सबैको साथ र सहयोगले अघि बढेको बताए ।
खेल फरक भए पनि दुवैको क्षेत्र एउटै भएकाले क्रस स्पोट्र्स कल्चर विकास गर्नेसँगै एकले अर्कोलाई सहयोग गर्नुपर्ने र सँगसँगै अगाडि बढ्नुपर्ने लक्ष्यका साथ सहकार्य गरेको पोखरा एभेन्जर्सका अध्यक्ष सुबोध त्रिपाठीले बताए । उनले भने, ‘हामी दुवै क्लब गण्डकी प्रदेशभित्रका हौँ । पोखरा एभेन्जर्सले नेपाल प्रिमियर लिग मार्फत नेपालको क्रिकेट विकासमा योगदान दिइरहेको छ । लालिगुराँस पनि यही क्षेत्रको भएकोले हामीले सहयोग गरेका हौँ ।’ लालिगुराँसले आफ्नो पहिलो खेलमा बिहीबार जावलाखेल युथ क्लबसँग भिड्ँदैछ ।
