बर्दियामा घाइते अवस्थामा फेला परेको चितुवाको उपचारका क्रममा मृत्यु

बर्दियामा घाइते अवस्थामा फेला परेको चितुवाको उपचारको क्रममा मृत्यु भएको छ । राजापुर नगरपालिका– १०, कर्मोनीमा घाइते अवस्थामा फेला परेको चितुवाको उपचारको क्रममा मृत्यु भएको हो ।  घाइते चितुवाले  पुस १२ गते राति स्थानीय हेमराज बुढाथोकीलाई आक्रमण गरेर घाइते बनाएको थियो ।  

घाइते अवस्थामा  पुस १३ गते बिहानै गहुँबारीमा चितुवा  देखेपछि  स्थानीय, डिभिजन वन कार्यालय र राष्ट्रिय प्रकृति संरक्षण कोषको प्राविधिक टोलीले चितुवा नियन्त्रणमा लिएको थियो । 

घाइते चितुवाको उपचार डिभिजन वन कार्यालयमा राखेर उपचार हुँदै थियो । उपचारको क्रममा सोमबार चितुवाको मृत्यु भएको डिभिजन वन कार्यालयका वरिष्ठ अधिकृत रामगोपाल चौधरीले जानकारी दिए । उनले भने, ‘उपचारको क्रममा मृत्यु भएको चितुवाको पोस्टमार्टम  गरी मंगलबार गाडिएको छ ।’