२५औँ स्थापना दिवस (रजत महोत्सव) को सन्दर्भ पारेर सशस्त्र प्रहरी बल नेपालले एक साताअघि पूर्वी सीमा मेची पुलबाट थालेको ‘पूर्व–पश्चिम झन्डा मार्च कार्यक्रम’ आइतबार सिरहा प्रवेश गरेको छ ।
कोशी प्रदेशअन्तर्गत पूर्वको झापा, मोरङ र सुनसरी हुँदै गत शुक्रबार मधेश प्रदेशको सप्तरी आएको मार्च आइतबार मध्यान्ह सिराहाको बलान नदीबाट सिरहा प्रवेश गरेको हो । झन्डा मार्च सिरहा प्रवेश गर्ने क्रममा सशस्त्र प्रहरी बल ६ नम्बर गण हेडक्वाटर सप्तरीका प्रमुख प्रहरी उपरीक्षक रोशन बुढाथोकीले सशस्त्र प्रहरीको झन्डा ७ नम्बर गण हेडक्वार्टरका प्रमुख प्रहरी उपरीक्षक नरेश भण्डारी र नेपालको राष्ट्रिय झन्डा सप्तरीको बलानबिहुल गाउँपालिकाका अध्यक्ष खेमचन्द्र यादवले सिराहाको भगवानपुर गाउँपालिका अध्यक्ष उग्रनारायण यादवलाई हस्तान्तरण गरे।
७ नम्बर गण हेडक्वाटरका प्रमुख प्रहरी उपरीक्षक नरेश भण्डारीका अनुसार सशस्त्र प्रहरीको झण्डा प्रहरी बलको स्थापना दिवसको सन्दर्भ पारेर पूर्व मेची र पश्चिम महाकालीबाट एकै दिन हिँडेको ‘झण्डा मार्च’ आगामी ७ माघमा चितवनको ठोरीमा एकतृत हुँदैछ । ‘झण्डा मार्चको क्रममा सशस्त्र प्रहरी बलको २५ वर्षे गौरवपूर्ण सेवा समर्पण र बलिदानलाई स्मरण गरिरहेका छौं,’ उनले भने, ‘संगठनभित्र एकता, समन्वय र टोली भावना सुदृढीकरणका लागि केन्द्रित भएका छौं ।’
उनका अनुसार झण्डा मार्चको रुटमा पर्ने भारतीय समकक्षी सीमा रक्षक बलसँग शुभकामना आदानप्रदानसँगै दसगजा क्षेत्रमा संयुक्त पेट्रोलिङ गरिने जानकारी दिए । झण्डा मार्च हरेक जिल्लामा सशस्त्र प्रहरी निरीक्षकको कमाण्डमा ३५ जनाको टोलीले राष्ट्रिय र सशस्त्र प्रहरी बलको झण्डा बुझेपछि अर्को जिल्लाको टोलीलाई हस्तान्तरण गर्दै ठोरीसम्म पुग्ने उनले बताए ।
