पूर्वमन्त्री उमेश यादव जसपा नेपालमा प्रवेश

प्रचण्ड नेतृत्वको नेपाली कम्युनिस्ट पार्टी (नेकपा)का केन्द्रीय सदस्य तथा पूर्वमन्त्री, सप्तरीनिवासी उमेशप्रसाद यादव आज जनता समाजवादी पार्टी (जसपा) नेपालमा प्रवेश गरेका छन्।

मंगलबार जसपा नेपालको पार्टी कार्यालय बालकुमारीमा आयोजित एक कार्यक्रममा जसपा नेपालका राष्ट्रिय अध्यक्ष उपेन्द्र यादवले नेता यादवलाई औपचारिक रूपमा पार्टीमा स्वागत गरेका हुन्।

पार्टी प्रवेश कार्यक्रममा बोल्दै यादवले देशको वर्तमान राजनीतिक अवस्था, संघीयताको कार्यान्वयन, मधेशको अधिकार, पहिचान र सामाजिक न्यायका सवालमा जसपा नेपालको एजेन्डा स्पष्ट र जनमुखी रहेको भन्दै त्यसैमा विश्वास गरेर पार्टी प्रवेश गरेको बताए।

‎जसपा नेपालका अध्यक्ष उपेन्द्र यादवले  यादवको प्रवेशले पार्टी संगठन सुदृढ हुनुका साथै मधेश आन्दोलन र समावेशी लोकतन्त्रको संघर्ष थप बलियो हुने विश्वास व्यक्त गरे। उनले अनुभवी नेता यादवको भूमिकाले पार्टीलाई राष्ट्रिय राजनीतिमा अझ प्रभावकारी बनाउन सहयोग पुग्ने बताए।

‎पूर्वमन्त्री यादव लामो समयदेखि वामपन्थी राजनीतिमा सक्रिय रहँदै आएका थिए। उनको जसपा नेपाल प्रवेशलाई सप्तरीसहित मधेश प्रदेशको राजनीतिमा महत्त्वपूर्ण घटनाका रूपमा हेरिएको छ। यादव प्रचण्ड नेतृत्वको नेकपाका केन्द्रीय सदस्य, पूर्वसिँचाइमन्त्री, संविधान सदस्य हुन् । 

यसैगरी, उनी तत्कालीन जनयुद्ध जनयुद्धको क्रममा नेकपा माओवादीमा आबद्ध भई सेल कमिटीदेखि केन्द्रीय सदस्य, मधेशी राष्ट्रिय मुक्ति मोर्चा सप्तरीको संयोजक, जिल्ला जनसरकार प्रमुख, जिल्ला जनमिलिसिया कमिसार, जनमुक्ति सेनाको बटालियन कमिसार, वाइसिएल नेपालको मिथिला क्षेत्रको संयोजकको भूमिका सक्रिय रूपमा निर्वाह गरिसकेका छन्।