- आइसिसी टी–२० महिला विश्वकप ग्लोबल छनोटका लागि क्यानले आइतबार घोषणा गरेको राष्ट्रिय टोलीमा सीता रानामगर, काजल श्रेष्ठ र सोनु विष्टले बनाए स्थान
नेपाल क्रिकेट संघ (क्यान)ले आइतबार आइसिसी महिला टी–२० विश्वकप ग्लोबल छनोटका लागि नेपाली राष्ट्रिय टोलीको घोषणा गरेको छ । इन्दु बर्माको कप्तानीमा १५ सदस्यीय टोली घोषणा हुँदा तीनजना खेलाडीले पुनरागमन गरेका छन् । सीता रानामगर, काजल श्रेष्ठ र सोनु विष्टले स्थान सुरक्षित गरेका हुन् । यसअघि प्रारम्भिक चरणमा रहेका रुबी पोदार, सना प्रवीण, ईश्वरी विष्ट, सोनी पाख्रिन र लक्ष्मी साउदले अन्तिम टोलीमा स्थान बनाउन सकेनन् ।
टोलीमा स्थान बनाएकी सीताले नेपालबाट ६३ टी–२० आई खेलेकी छिन् । उनले ५९ इनिङ्समा ९६५ रन बटुलेकी छिन् । बलिङका क्रममा उनले ५७ विकेट हात पारेकी छिन् । नेपाली महिला क्रिकेट टोलीकै पहिलो पुस्ताकी खेलाडी सीताले अन्तिमपटक गत वर्षको ७ अक्टोबरमा मलेसियाविरुद्ध प्रतिस्पर्धा गरेकी थिइन् । विकेटकिपर ब्याट्सम्यान काजलले सन् २०२४ को २३ जुलाईपछि राष्ट्रिय टोलीमा स्थान बनाएकी हुन् । उनले अन्तिमपटक भारतविरुद्ध प्रतिस्पर्धा गरेकी थिइन् ।
अलराउन्डर सोनुले सात टी–२० आई खेलेकी छिन् । उनले अन्तिमपटक गत वर्षको अक्टोबरमा मलेसियाविरुद्ध खेलेकी थिइन् । बलिङमा उनले सात इनिङ्समा चार विकेट हात पारेकी छिन् । सीता र सोनु डेढ वर्षपछि टोलीमा फर्कन लागेका हुन् । क्यानले दोस्रो चरणको प्रशिक्षणमा रहेका २० खेलाडीबाट अन्तिम टोली छानेको हो । उमेर समूहदेखि उत्कृष्ट प्रदर्शन गर्दै आइरहेकी पूजा महतोले उपकप्तानीको जिम्मेवारी पाएकी छिन् । नियमित खेलाडी पूर्वकप्तान रुविना क्षेत्री, विन्दु रावल, सम्झना खड्का तथा कविता जोशीले पनि ग्लोबल छनोटमा स्थान पक्का गरेका छन् । कविता कुँवर, रचना चौधरी, रिया शर्मा, रोमा थापा, राजमती ऐरी र मनीषा उपाध्यायसहितको टोली घोषणा गरिएको हो ।
ग्लोबल छनोटमा नेपाल समूह ‘बी’मा रहेको छ । नेपालले समूह चरणमा नेदरल्यान्ड्स, स्कटल्यान्ड, थाइल्यान्ड र जिम्बावेविरुद्ध खेल्नेछ । अघिल्लो संस्करणमा थाइल्यान्डले विश्वकप खेलेको थियो । थाइल्यान्डले हर्षल पाठकको मुख्य प्रशिक्षणमा विश्वकप खेलेको थियो । अहिले नेपाली राष्ट्रिय महिला टोलीलाई उनै पाठकले प्रशिक्षण दिइरहेका छन् । पाठकले जिम्मेवारी सम्हालेपछि टोलीले नियमित प्रशिक्षण गरिरहेको क्यानले जनाएको छ ।
ग्लोबल छनोटमा १० राष्ट्र सहभागी
ग्लोबल छनोटमा नेपालसहित १० राष्ट्रले प्रतिस्पर्धा गर्नेछन् । छनोटमा ३२ खेल हुने आयोजक क्यानका प्रवक्ता छुम्बी लामाले बताएका छन् । शीर्ष चार राष्ट्रले आगामी जुनमा इंग्ल्यान्डले आयोजना गर्ने महिला टी–२० विश्वकप खेल्नेछन् । नेपाल पहिलोपटक ग्लोबल छनोटमा पुगेको हो । समूह चरणको खेलपछि शीर्ष तीन–तीन राष्ट्र सुपर सिक्समा प्रवेश गर्नेछन् । सुपर सिक्सको खेलपछि शीर्ष चारमा रहने टोलीले विश्वकपको टिकट पक्का गर्नेछन् । नेपालले पहिलोपटक विश्वकप ग्लोबल छनोट आयोजना गर्ने अवसर पाएको हो । आयोजक क्यानले कीर्तिपुरस्थित त्रिवि अन्तर्राष्ट्रिय क्रिकेट र मूलपानीको क्रिकेट मैदानमा प्रतियोगिता आयोजना गर्नेछ । प्रतियोगिता आगामी २८ पुस देखि १८ माघसम्म चल्नेछ ।
छनोट हुँदा नेपाललाई टेस्ट राष्ट्रसँग खेल्ने अवसर
ग्लोबल छनोटमा शीर्ष चारमा स्थान बनाउँदा नेपालले पहिलोपटक विश्वकप खेल्न अवसर पाउनेछ । यससँगै टेस्ट मान्यताप्राप्त राष्ट्रविरुद्ध खेल्न मौका नेपालसमक्ष छ । इंग्ल्यान्डमा आगामी १२ जुनदेखि ५ जुलाईसम्म हुने आइसिसी महिला टी–२० विश्वकपको समूह विभाजन भइसकेको छ । समूह ‘ए’मा अस्ट्रेलिया, भारत, पाकिस्तान र दक्षिण अफ्रिका छन् । समूह ‘बी’मा इंग्ल्यान्ड, न्युजिल्यान्ड, श्रीलंका र वेस्ट इन्डिज रहेका छन् । यी दुवै समूहमा ग्लोबल छनोटबाट आउने समान दुई राष्ट्रले स्थान बनाउनेछन । यस अर्थमा ग्लोबल छनोटमा शीर्ष चार स्थान मात्र रक्षा गर्दा नेपालले महिला क्रिकेटकै शक्तिशाली राष्ट्रविरुद्ध प्रतिस्पर्धा गर्ने अवसर प्राप्त गर्नेछ । आइसिसीले ग्लोबल छनोटपछि मात्र वरीयताअनुसार चार राष्ट्रलाई समूहमा समावेश गर्नेछ ।
नेपालको समूहमा अनुभवी राष्ट्र
नेपालले आफ्नो समूहमा अनुभवी राष्ट्रविरुद्ध प्रतिस्पर्धा गर्नेछ । ग्लोबल छनोटमा सहभागीमध्ये थाइल्यान्ड मात्र विश्वकप खेलेको राष्ट्र हो । नेदरल्यान्ड्सले चौथोपटक ग्लोबल छनोट खेल्न लागेको हो । स्कटल्यान्ड र जिम्बावेले यसअघि तीनपटक छनोट चरण खेलेका थिए । आइसिसीको महिला टी–२० वरीयतामा जिम्बावे अगाडि छ । जिम्बावे १२, नेदरल्यान्ड्स १३औँ, स्कटल्यान्ड १४औँ र नेपाल १७औँ स्थानमा छ । थाइल्यान्ड ५८औँ स्थानमा रहेको आइसिसीको पछिल्लो वरीयतामा उल्लेख छ । नेपालले ग्लोबल छनोटअघि आयरल्यान्ड र अमेरिकासँग अभ्यास खेल खेल्नेछ ।
एसियन छनोटको उपविजेता नेपाल
गत मेमा थाइल्यान्डले नौ राष्ट्रबिचको एसियन क्षेत्रीय टी–२० विश्वकप छनोट आयोजना गरेको थियो । आइसिसीले छनोटका शीर्ष दुई टोली ग्लोबल छनोटमा प्रवेश हुने प्रावधान बनाएको थियो । थाइल्यान्ड, कुवेत, भुटान, युएई, मलेसिया, कतार, नेपाल, हङकङ र बहराइन सहभागी थिए । नेपालले समूह ‘सी’मा चार खेलमा दुई जित र एक हारको सामना गरी ५ अंक बटुलेको थियो ।
यस समूहमा हङकङले पनि ५ अंक बनाएको थियो । रनरेटमा हङकङलाई पछि पार्दै नेपालले सुपर सिक्समा स्थान बनायो । सुपर सिक्समा थाइल्यान्डले ६ खेलमा चार जित निकाली सर्वाधिक १० अंक र नेपालले तीन जित र दुई हार सामना गरी ७ अंक जोडेको थियो । नेपाल उपविजेता रहँदै पहिलोपटक ग्लोबल छनोटमा पुगेको थियो ।
माया ग्रुपले बनायो नौ क्रिकेटरलाई ब्रान्ड एम्बासडर
माया ग्रुपले एकैपटक नौ क्रिकेटरलाई ब्रान्ड एम्बासडर बनाएको छ । नेपाली क्रिकेटलाई व्यावसायिक बनाउने क्रममा आइतबार नेपाली राष्ट्रिय टोलीका उपकप्तान दीपेन्द्रसिंह ऐरी, भीम सार्की, गुल्सन झा, नन्दन यादव र अर्जुन साउदलाई ब्रान्ड एम्बासडर बनाएको हो । यसैगरी, रिजन ढकाल, प्रसिद्ध जैसी, सुशील रावल र नेपाली यू–१९ महिला क्रिकेट टोलीकी उपकप्तान सोनी पाख्रिन पनि माया ग्रुपको ब्रान्ड एम्बासडर बनेका छन् । नौजना खेलाडीसँग माया ग्रुपले प्रायोजनसम्बन्धी सम्झौता गरेको छ । माया ग्रुप सन् २०१८ मा स्थापना भएको हो ।
गत वर्षको मे र जुनमा नेपाली राष्ट्रिय पुरुष क्रिकेट टोलीले गरेको इंग्ल्यान्ड र स्कटल्यान्ड भ्रमण गर्दा माया ग्रुपले नै व्यवस्थापनको जिम्मा लिएको थियो । सम्झौताले क्रिकेट खेलाडीको प्रतिभालाई अझ परिष्कृत गराउन सहयोग गर्ने मायाले विश्वास लिएको छ ।
