लाङ्दीदेवी युवा क्लब, लमजुङले जारी ३३औँ त्रिवेणी कपको उपाधि यात्रा तय गर्दा ‘ए’ डिभिजन लिग विजेता चर्च बोइज युनाइटेड भने प्रतियोगिताबाट बाहिरिएको छ ।
त्रिवेणी युवा क्लब लमजुङको आयोजनामा बेँसीसहरस्थित त्रिवेणी रंगशालामा जारी प्रतियोगिताअन्तर्गत आइतबार सम्पन्न सेमिफाइनल खेलमा बेँसीसहर–७, नाल्मास्थित लाङ्दीदेवीले लिग विजेता चर्च बोइजलाई २–० गोलअन्तरले पराजित गरेको हो । लाङ्दीदेवीले उपाधिका लागि डिफेन्डिङ च्पाम्पियन विभागीय सशस्त्र प्रहरीको नेपाल एपिएफ क्लबसँगको भेट पक्का गरेको हो ।
शनिबार सम्पन्न पहिलो सेमिफाइन खेलमा एपिएफले लमजुङको मर्स्याङ्दी युवा क्लबलाई टाइब्रेकरमा ४–३ गोलअन्तरले पराजित गर्दै अन्तिम दुईमा स्थान बनाएको थियो ।
खेलको ३६औँ मिनेटमा रोहन कार्कीले पहिलो गोल गर्दै टोलीलाई सुरुवाती अग्रता दिलाएका थिए । पहिलो हाफमा एक गोलले पछि परेको चर्च बोइजले दोस्रो हाफमा खेललाई बराबरीमा ल्याउन प्रयास गरे पनि सकेको थिएन । ९० मिनेटको निर्धारित समयमा खेल १–० मा रहेको अबस्थामा त्यसपछि थपिएको दुई मिनेटको इन्जुरी समयको पहिलो मिनेट ९०+१ मा लाङ्दीदेवीका आशिष गुरुङले गोल गर्दै टोलीको अग्रता दोब्बर पारेपछि चर्च बोइजले स्थानीय क्लबसँग लज्जास्पद हारको सामान गर्दै प्रतियोगिताबाट बाहिरिएको हो । चर्च बोइजका खेलाडीले डिबक्सभित्र फल गरेपछि पाएको पेनाल्टीलाई आशिषले पोस्टको दिशा दिन सफल भएका थिए ।
मोफसलको लाङ्दीदेवी यसअघि प्रिक्वाटर फाइनलको खेलमा चित्लाङ फुटबल क्लबलाई १–० र क्वाटरफाइनलमा ‘ए’ डिभिजन क्लब न्युरोड टिम (एनआरटी)लाई सडनडेथमा पराजित गर्दै अन्तिम चारमा स्थान बनाएको थियो।
१२ पुसदेखि जारी प्रतियोगितामा ‘ए’ डिभिजन चारसँगै मोफसलका र आयोजक गरी १६ टोली सहभागी छन्। प्रतियोगिताको विजेताले १२ लाख, उपविजेताले ६ लाख नगदसँगै ट्रफी, मेडल र प्रमाणपत्र, प्रतियोगिताको सर्वोत्कृष्ट खेलाडी, सर्वाधिक गोलकर्ता र उत्कृष्ट गोल किपरले जनही २५-२५ हजार नगद ट्रफी र प्रमाणपत्र पुरस्कार पाउँदा प्रत्येक खेलका म्यान अफ द म्याचले १० हजार र ट्रफी पाउने आयोजक क्लबका अध्यक्ष टेकजंग गुरुङले जानकारी दिए।
जितपछि लाङ्दीदेवीका प्रशिक्षक राजकुमार गुरुङले प्रतियोगितामा आफूहरूले सुरुको खेलदेखि डिफेन्स लाइनलाई बलियो बनाएको बताए । यसअघि बलिया दुई टोलीलाई पराजित गरेका कारण खेलाडीको मनोबल उच्च रहेको र सोहीअनुसार आज प्रर्दशन गर्दा जितका लागि सहज भएको बताए । आजको खेलमा पहिलो हाफमा अग्रता लिने उदेश्यसहित टोली मैदान उत्रेको र सोहीअनुसार सफल भएको उनको भनाइ छ ।
