अखिल नेपाल फुटबल संघ (एन्फा)को आगामी साधारणसभा माघ २८ गते हुने भएको छ। बुधबार सातदोबाटोस्थित एन्फा मुख्यालयमा भएको कार्यसमिति बैठकले माघ अन्तिम साता चुनावी साधारणसभा गर्ने निर्णय गरेको हो।
५ असार २०७९ मा भएको निर्वाचनबाट चुनिएको वर्तमान एन्फा कार्यसमितिको कार्यकाल आगामी असार ४ गते पूरा हुँदै छ। तर, त्यही समयमा अमेरिका, क्यानडा र मेक्सिकोमा विश्वकप फुटबल प्रतियोगिता हुने भन्दै त्यसअघि नै अर्ली इलेक्सन गर्ने पक्षमा एन्फा नेतृत्व पुगेको हो।
त्यस्तै, एन्फाले ४९ जिल्ला र सात प्रदेशको निर्वाचनविनै केन्द्रको निर्वाचन गर्न लागेको छ। यद्यपि, यही विषयमा केही पदाधिकारीले असन्तुष्टि जनाए पनि अध्यक्ष पंकजविक्रम नेम्वाङले बहुमत पक्षधरको साथ मिति टुंगो लगाएका हुन्।
