महाकाली पुल र बस्ती बचाउन तटबन्दको काम वर्षायामअघि नै सम्पन्न गरौँ : मन्त्री घिसिङ

बिहिबार, ३ पुष, २०८२
डिजिटल संस्करण

ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले चार लेनको महाकाली पुल र त्यस वरपरको बस्तीलाई बचाउन नदी किनार संरक्षणको काम तत्काल अगाडि बढाउनुपर्ने बताएका छन्।महाकाली पुल र महाकाली नदीले कटान गरेको क्षेत्रको जानकारी लिन त्यस क्षेत्रमा पुगेका मन्त्री घिसिङले तटबन्धको काम गराउनेमा हाल रहेको अन्याेललाई तत्काल निरुपण गरी निर्माण अगाडि बढाउनुपर्ने बताए। 

आगामी वर्षायामअगाडि नै काम सम्पन्न गर्न नसकिएमा नदीमा आउने बाढीबाट पुल र नदीको बायाँ किनारतर्फको बस्ती नै जोखिममा पर्ने सम्भावना देखिएकाले तटबन्ध व्यवस्थापनको काम तत्काल अगाडि बढाउन सडक विभाग र महाकाली पुल योजना व्यवस्थापनलाई निर्देशन दिए। महाकालीपारिको दोधारा–चाँदनी नगरपालिकालाई सडक सञ्जालसँग जोड्ने र दोधारा–चाँदनीमा निर्माणाधीन सुक्खा बन्दरगाहलाई लक्षित गरी महाकालीमा चार लेनको पक्की पुल निर्माण गरी सञ्चालनमा छ ।  

बाढीबाट पुललाई बचाउन मन्त्रिपरिषद्को ६ जेठ ०८२ को निर्णयबाट महाकाली पुलआसपास महाकाली नदी बिचभागमा जम्मा भएको नदीजन्य पदार्थ हटाई व्यवस्थापन तथा बाढीजन्य विपत् न्यूनीकरणका लागि आवश्यक पर्ने अस्थायी नदी नियन्त्रणको काम सेनाबाट गराउने स्वीकृति भएको थियो । त्यसपछि अस्थायी संरचना सेनाबाट निर्माण गरिएका थिए ।

तत्कालीन वर्षाको जोखिमलाई ध्यान दिएर सेनाद्वारा आपतकालीन रूपमा निर्माण गरिएका संरचना अस्थायी प्रकृतिका भएका कारण थप सबलीकरण गर्नुपर्नेछ । पुलबाट माथिल्लो तटीय बायाँ किनारमा नेपाली सेनाले करिब तीन सय मिटर निर्माण गरेको अस्थायी प्रकृतिको संरचनाको सबलीकरण आवश्यक रहेको हो ।सबलीकरणको काम तत्काल अगाडि बढाउन निर्देशन दिँदै मन्त्री घिसिङले त्यसका लागि आवश्यक सहजीकरण गर्ने बताए। योजनाले सबलीकरण कार्यको डिजाइन तयार गरिसकेको छ ।

सुझावित समाचार